دوسری PCG سائیکل ریلی میں نیا عالمی ریکارڈ ۔۔۔

29 ستمبر 2016 کی صبح بلوچستان میں ملک بھر سے منتخب 26 سائیکل سواروں کے اوتھیلو سے گوادر تک 550 کلومیٹر کے سواری مقابلے کا آغاز ڈی جی پاک کوسٹ گارڈ بریگڈیر عتیق الرحمن نے کیا ۔ پہلے مرحلے میں سائیکل سواروں نے اوتھیلو سے اورماڑو تک 250 کلومیٹر کا سفر طے کیا جس میں شہر قائد کے علاقے اورنگی ٹاؤن کے سائیکل سوار عرفان نے پہلی پوزیشن حاصل کی ۔

عرفان کی یہ پوزیشن نہ صرف ان کی پوری ریلی میں فاتح کی صورت میں تبدیلی کا باعث بنی بلکہ انہوں نے دنیا کی سب سے بڑی سائیکل ریلی ٹور ڈی فرانس جو کہ 237کلومیٹر پر مبنی ہوتی ہے اس کا ریکارڈ بھی توڑ دیا انہوں نے پہلا مرحلہ جو کہ 250 کلومیٹر پر مشتمل تھا اس طویل مسافت کو عرفان اور ان کے دیگر سائیکل سواروں ساتھیوں نے 10 گھنٹوں اور 45 منٹ میں عبور کر کے عالمی سطح پر اک نیا عالمی ریکارڈ قائم کر دیا ۔
 

اختتامی تقریب بابا بزنجو اسٹیڈیم کے شرکاء کو اس وقت فاتح سائیکل سوار کا انتظار تھا ، ملی نغموں کے ذریعے ماحول میں خوشگواریت تھی ، تقریب کے مہمان خصوصی ڈی جی پاکستان کوسٹ گارڈ بریگیڈیئر عتیق الرحمن تھے جن کے آمد کے ساتھ ہی تقریب کا آغاز کیا گیا۔ان سمیت صوبائی اسمبلی کے رکن میر کلمتی و دیگر میونسپل کارپوریشن کے ذمہ داران بھی موجود تھے ۔کرنل معظم نے اسٹیج سیکریٹری کے فرائض سرانجام دیئے،انہوں سے تقریب کے آغاز میں شرکاء تقریب کو خوش آمدید کہا ، سائیکل ریلی کے اغراض و مقاصد بتائے اور تلاوت کے ذریعے تقریب کا آغاز کیا گیا ۔ دلچسپ امر یہ تھا کہ تلاوت کے بعد اسکول کے بچوں کو اسٹیج پر بلا کو ان سے قومی ترانہ پڑھوایا گیا جس کے دوران مہمان خصوصی و دیگر قانون نافذ کرنے والے اداروں کے اہلکاروں نے سلامی دی جبکہ دیگر شرکاء تقریب نے کھڑے ہوکر قومی ترانہ کو سنا ۔ اس کے بعد تقریب آگے کی جانب بڑھی ، کوسٹ گارڈ کے ایک دستے نے اپنے کارکردگی کا مظاہرہ کیا ، ان کے بعد کوسٹ گارڈز کے جوانوں نے بین باجے کے ذریعے اپنے فن کا مظاہرہ کیا ، بلوچ دھن پر متعدد نغمے پیش کئے گئے۔ بلوچ دھن کے آغاز پر ایک صتحمند دس سالہ بچے نے گراؤنڈ میں آکر اپنے فن کا مظاہرہ کیا ، اس دوران وہ اسٹیج تک آیا اس عمل کو بھی شرکاء نے دل کھول کرداد کی۔ اسی دوران کرنل معظم نے شرکاء تقریب کو بتایا کہ چند لمحوں میں سائکل سوار گراؤنڈ میں داخل ہونے والے ہیں اور جونہی سائیکل سوار میدان میں داخل ہوئے ہزاروں شرکاء تقریب نے پرجوش انداز میں ان کا استقبال کیا ۔

26سائیکل سوار جب میدان میں داخل ہوچکے تو اسی دوران اعلان کیا گیا کہ اورنگی ٹاؤن کے سائیکل سوار عرفان نے پہلی ، ماڈل کالونی کے کاشف نے دوسری اور لیاری کے یسین نے تیسری پوزیشن حاصل کی ہے، یہ واضح رہے کہ نوجوان عرفان نے ابتدائی ،ثانوی سمیت آخری مراحل میں پہلی پوزیشن حاصل کی۔ ریس جیتنے پر انہیں زبردست داد دی گئی انہیں انعام و اکرام سے نواز گیا اس کے ساتھ ہی انہوں اپنی نوعیت کا عالمی ریکارڈ بھی قائم کر دیا ۔ پہلی پوزیشن حاصل کرنے والے کو تین لاکھ ، دوسرے کو دو لاکھ جبکہ تیسرے نمبر پر آنے والے کو ایک لاکھ روپے دیئے گئے۔

انعامات کی تقسیم کے بعد بریگیڈئیر عتیق الرحمن نے خطاب کرتے ہوئے تمام سائیکل سواروں کو مبارکباد دی ان کی حوصلہ افزائی کی ۔ انہوں نے کہا کہ بلوچستان کے نوجوانوں کو مثبت سرگرمیوں کی جانب راغب ہونا چاہئے وہ باصلاحیت نوجوان ہیں جو کہ ملک کی تعمیر و ترقی میں نمایاں کردار اداکرسکتے ہیں ۔ انہوں نے مزید کہا کہ بلوچستان سمیت ملک کی دفاع کیلئے کسی قربانی سے دریغ نہیں کرینگے ، ان کا کہنا تھا وہ وقت دور نہیں جب بلوچستان ملک کی تعمیر و ترقی میں نمایاں کردار ادا کریگا۔ انہوں نے نوجوانوں پر زور دیتے ہوئے کہا کہ وہ تخریبی سرگرمیوں سے دور اور تعمیری سرگرمیوں کی جانب بڑھیں ۔بلوچستان ایک گلدستہ کی مانند ہے ، اس گلدستے کی حفاظت کیلئے پاک فوج ، نیوی، لیوز ، ہائیوے پولیس ، مقامی پولیس اور کوسٹ گارڈز سمیت سبھی ہر دم تیار ہیں۔ بعدا زاں پاکستان زندہ باد کے نعرے پہر تقریب کا اختتام ہوا۔

دوسری پی سی جی سائیکل ریلی کے میں رحیم بخش ، ولید، احسان اﷲ ، ریاض احمد ، حق نواز ، عاشر، سراج، میر نواز مہر ، بلال ، غلام محمد، شاہجہاں ، وسیم ، ضمیر احمد، عبداﷲ ، الیاس ، شہزاد، محمد سرور، حبیب، عبد الحلیم ، محمد عرفان، ابو بکر، عرفان احمد ، کاشف، یسین اور عرفان خان نے شرکت کی۔ سائکل ریلی کے منتظمین میں کلیم اعوان نے کلیدی کردار ادا کیا ۔

پاکستان میں باصلاحیت نوجوانوں کی کوئی کمی نہیں تاہم ضرورت اس امر کی ہے کہ حکومت ایسے باصلاحیت نوجوانوں کو وسائل مہیا کرے ، انہیں کھیل کے ہر شعبہ میں معیاری وسائل اور رہنمائی کی فراہم کریں تاکہ یہی نوجوان کھلاڑی ملک و قوم کا نام پوری دنیا میں روشن کرسکیں۔