پاکستان میں محبت کی شادی کی چند منفرد داستانیں

پاکستان میں محبت کی شادیوں کا رجحان بڑوں کی جانب سے طے شدہ شادیوں کے مقابلے میں کافی کم ہے٬ اور ایسی شادیوں کو نہ صرف ناکام سمجھا جاتا ہے بلکہ ہمارے معاشرے کا ایک بڑا حصہ اسے ناپسند بھی کرتا ہے- ان سب کے باوجود پاکستان میں کچھ ایسی محبت کی شادیاں بھی سرانجام پائی ہیں جو کہ نہ صرف میڈیا میں مشہور ہوئیں بلکہ ان سے یہ بھی ثابت ہوا محبت میں کسی چیز کی قید نہیں ہے٬ کیسے؟ یہ آپ خود ہی ملاحظہ فرمائیں:
 

دوسری جنگِ عظیم کے ایک سپاہی کی کہانی
دوسری جنگِ عظیم کے زمانے میں 20 سالہ مظفر خان کو ایک سپاہی کی حیثیت سے برما بھیجا گیا- وہاں انہیں ایک لڑکی سے محبت ہوگئی اور انہوں نے اس سے شادی کرلی- اس لڑکی نے مظفر خان کے لیے اپنے ملک کو چھوڑا اور ہمیشہ کے لیے چکوال کے قریب ایک چھوٹے سے گاؤں میں آ کر بس گئی- آج مظفر خان 92 سال کے اور ان کی اہلیہ 84 برس کی ہوچکی ہیں اور ایک خوشگوار زندگی گزار رہے ہیں-

قوتِ سماعت سے محروم پاکستانی لڑکا اور اطالوی لڑکی
22 سالہ پاکستانی نوجوان مدثر کی دوستی اٹلی کی رہائشی 23 سالہ ماریہ سے انٹرنیٹ پر ہوئی جو کہ رفتہ رفتہ محبت میں تبدیل ہوگئی- یہ دونوں نوجوان قوتِ سماعت کی نعمت سے محروم ہیں- سچی محبت کو پانے کی خاطر ماریہ اٹلی سے پاکستان آ گئیں اور یہاں یہ دونوں نوجوان شادی کے بندھن میں بندھ گئے-

پستہ قد لڑکے کی دراز قد کی لڑکی سے شادی
آزاد کشمیر کے شہر میر پور کے سردار عارف کا قد 2 فٹ 5 انچ تھا لیکن وہ خوش قسمتی سے اپنا ایسا سچا پیار حاصل کرنے میں کامیاب ہوگئے جس میں لڑکی کا قد 5 فٹ 4 انچ تھا- شادی کے وقت سردار عارف کی عمر 35 سال جبکہ ان کی اہلیہ شمائلہ کی عمر 25 سال تھی- یہ دونوں ایک ہی جگہ ملازمت کرتے تھے اور ایک دوسرے سے محبت کرتے تھے-

بھارتی لیڈی ڈاکٹر کو سچا پیار پاکستان لے آیا
بےشک محبت پاک بھارت ٹاکرے سے کہیں بڑھ کر ہے اور اس کا واضح ثبوت اس بات سے ملتا ہے کہ ایک بھارتی خاتون ڈاکٹر پاکستان کے صوبہ پنجاب علاقے لیہ میں رہائش پذیر اپنے محبوب ملنے چلی آئیں- 26 سالہ ڈاکٹر پراتیما کو 32 سالہ محمد منشا سے محبت ہوگئی- بھارتی ڈاکٹر نے پہلے اسلام قبول کیا اور پھر یہ دونوں رشتہ ازدواج میں منسلک ہوگئے- خاتون کا نیا نام مریم بی بی ہے-

فیس بک نے دو دل ملائے
حافظہ آباد سے تعلق رکھنے والے 18 سالہ پاکستانی نوجوان نعمان اور ساؤتھ افریقہ میں مقیم 21 سالہ زہرہ کے دل ملانے کا سہرہ فیس بک کے سر ہے- ان دونوں نوجوانوں کی ملاقات سماجی روابط کی مقبول ترین ویب سائٹ فیس بک پر ہوئی- زہرہ نے محبت کی خاطر اپنے وطن کو چھوڑا اور پاکستان چلی آئیں اور شادی کر کے یہیں بس گئیں-