کچنار کے فوائد

قارئین ! اب تک آپ کم و بیش کافی سبزیوں کے فوائد جان چکے ہیں اور بہت کم ہی رہ گئی ہیں جن کے فوائد آپ کو ابھی تک میں نہیں بتا سکا ۔آج بھی ایک سبزی کچنار ہے جس کے فوائد میں آپ کو اپنے اس مضمون میں بتانے جا رہا ہوں۔
 

لکھنے کا مقصد آپ کے علم میں اضافہ کرنا ہوتا ہے اور یہ باور کرانا ہوتا ہے کہ ان سبزیوں کے کھانے سے آپ کو کیا فوائد اور کیا نقصانات ہو سکتے ہیں ۔سبزیاں کھانے سے زیادہ تر ہمیں فوائد ہی حاصل ہوتے ہیں لیکن چند ایسی سبزیاں بھی ہیں جن کے بہت کم نقصان بھی ہیں۔جن کا ذکر میں اپنے مضامین کے آخر میں کر دیتاہوں۔

ہمیں اپنے آپ کو سبزیوں کا عادی بنانا چاہئے۔ یقین کریں کہ آپ آج کے تمام موذی امراض سے بچ جائیں گے۔اور آپ کی زندگی خوش و خرم گزرے گی۔سبزیاں جہاں ہماری صحت کی ضامن ہیں وہیں پر یہ عمر کو بڑھانے میں بھی ہماری مددگار ہیں۔
 

موسم بہار جیسے ہی آتا ہے تو منڈی میں کچنار کی کلیاں بھی آ جاتی ہیں۔ یہ ایک درخت پر اگتی ہیں اور ان کو سبزی کے طور پر پکایا جاتا ہے۔ کچنار کو اگر گوشت اور قیمہ کے ساتھ پکایا جائے تو اس کا ذائقہ بھی گوشت یا قیمہ جیسا ہی محسوس ہوتا ہے۔ ویسے اگر کچا کھایا جائے تو یہ کڑوی ہوتی ہیں۔پکانے کے علاوہ آپ اس کا اچار بھی ڈال سکتے ہیں جو انتہائی مزیدار ہوتا ہے۔

اس میں نمکیات کے علاوہ وٹامن سی ہوتا ہے۔کچنار کے درخت بھارت اور پاکستان میں موجود ہیں۔یہ درخت درمیانے سائز کے ہوتے ہیں اور اس پر پھول لگتے ہیں ۔پھول بننے سے پہلے ان کی کلیوں کی سبزی پکائی جاتی ہے انھی کلیوں کو ہم کچنار کہتے ہیں۔اس کا مزاج سرد خشک ہوتا ہے۔
 

کچنار کے فوائد:
٭ کچنار کھانے سے خونی بواسیر میں فائدہ ہوتا ہے۔
٭ کچنار کھانے سے پیٹ کے کیڑے مر جاتے ہیں۔
٭کچنار کھانا خواتین کے لئے مفید ہے جن کو حیض زیادہ مقدار میں آتا ہو۔
٭کچنار سے جریان کے مریض بھی فائدہ اٹھا سکتے ہیں۔
٭کچنار کھانے سے اسہال رک جاتے ہیں۔
٭کچنار کھانے سے پھوڑے پھنسیوں سے نجات مل جاتی ہے۔
٭کچنار کھانا آنتوں کے لئے بھی مفید ہوتا ہے۔
٭کچنار پیشاب کے امراض میں فائدہ مند ہے۔
٭ اس کو گوشت یا قیمہ کے ساتھ ہی پکا کر کھائیں۔
٭ کچنار کھانسی میں بھی مفید ہوتی ہے۔
٭ کچنار کھانے سے زخم جلد بھر جاتے ہیں۔
٭ کچنار معدے کو تقویت دیتی ہے۔
٭ کچنار خون کو صاف کرتی ہے۔
٭کچنار بلڈ پریشر کے مریضوں کے لئے بھی مفید سبزی ہے۔

نوٹ:اس کا مزاج سرد خشک ہے اس لئے اس میں گھی کا استعمال زیادہ کریں اور اس کو گرم مصالحے اور ادرک کے ساتھ پکائیں