سینکڑوں سال پرانا گاؤں انتہائی جدید کیسے بنا؟

اٹلی کے علاقے Italian Riviera کے نزدیک ایک پہاڑ پر قرونِ وسطی کے دور سے تعلق رکھنے والا Colletta di Castelbianco نامی ایک قدیم ترین گاؤں واقع ہے-

یہ گاؤں قدیم پتھروں سے بنے گھروں پر مشتمل ہے جن کی چھتیں لال رنگ کی ٹائلوں سے تیار کردہ ہیں٬ ان کی کھڑکیوں میں نیلے رنگ کے شیشے نصب ہیں جبکہ ان کے بارڈر سفید رنگ کے ہیں-
 

تاہم ان قدیم گھروں کے پیچھے ٹیکنالوجی سے وابستہ کئی راز پوشیدہ ہیں کیونکہ یہاں کے ہر گھر میں براڈ بینڈ انٹرنیٹ کنکشن اور سیٹیلائٹ ٹی وی موجود ہے- اس کے علاوہ یہ گاؤں ایک جدید ترین کاروباری مرکز بھی ہے- یہاں ٹیلی کانفرنسنگ٬ فیکس اور آڈیو ویژیول آلات کا بزنس کیا جاتا ہے-

یہ گاؤں 13ویں صدی میں قائم کیا گیا تھا لیکن گزشتہ چند صدیوں کے دوران یہاں کے باشندے آہستہ آہستہ دیگر علاقوں میں منتقل ہوگئے- جب 1887 میں یہاں زلزلہ آیا تو یہ ہجرت تیز ہوگئی اور 1950 تک یہ گاؤں ویران ہوگیا-
 

لیکن 1990 کے اختتام تک اس گاؤں کو یورپ کے سب سے پہلے الیکٹرونک گاؤں میں تبدیل کردیا گیا-

نئی ٹیلی مواصلات ٹیکنالوجی کی بدولت٬ اس پرامن مقام پر دوبارہ یہاں لوگوں کو آباد ہونے کا موقع ملا- اس طرح یہ لوگ نہ صرف کام کے ماحول سے منسلک ہوئے بلکہ دنیا بھر سے معلومات کی فراہمی بھی یہاں ممکن بنائی گئی-
 

یہی وجہ ہے کہ آج یہاں موجود گھروں کی قیمتیں بھی آسمان کو چھو رہی ہیں اور یہ گھر ناقابلِ یقین حد تک مہنگے ہوچکے ہیں- 2008 میں اٹلی میگزین میں شائع ہونے والے ایک آرٹیکل کے مطابق اس وقت سب سے مہنگا گھر 587,000 یورو میں فروخت کیا گیا تھا-

یہاں سب سے کم مالیت کے گھر کی قیمت کی شروعات بھی 137,000 یورو سے ہوتی ہے- میگزین کا کہنا ہے کہ “اس گاؤں نے ثقافتی خریداروں کو جنم دیا ہے“-