دنیا کی پہلی “ ائیر کنڈیشنڈ “ گھڑی متعارف

اب تک آپ ٹیکنالوجی کی دنیا کی مختلف کمپنیوں کی تیار کردہ جدید سے جدید تر اسمارٹ واچز کی خوبیوں کے بارے میں سنتے آئیں ہوں گے لیکن حال ہی میں متعارف کروائی جانے والی دنیا کی سب سے پہلی “ ائیر کنیڈیشنڈ “ گھڑی نے تو ہر کسی کو حیران کردیا ہے-

جی ہاں یہ Aircon نامی گھڑی صارف کو براہ راست اس کی کلائی پر گرمائش یا پھر ٹھنڈک کا احساس فراہم کرتی ہے جس سے پورے جسم کا درجہ حرارت اس کے مطابق ہوجاتا ہے چاہے اس وقت موسم کیسا بھی ہو-
 

اس جدید گھڑی کو ایجاد کرنے والی کمپنی کا دعویٰ ہے کہ “ انسان اس گھڑی کے ذریعے نبض پر پڑنے والے ٹھنڈک یا گرمی کے احساس سے ان سگنل کو تبدیل کر سکتا ہے جو ہمارا اعصابی نظام ہمارے دماغ کو بھیجتا ہے- اور اس طریقے سے دماغ ٹھنڈک یا گرمائش کے بارے میں ہی سوچتا ہے“-

بظاہر یہ تمام جادو اس منفرد گیجٹ کے بیلٹ میں موجود ہے٬ اس گھڑی کی بیلٹ میں ایک چھوٹا سا آلہ نصب ہے جو کہ ClimaCon سے آراستہ ہے- یہ آلہ بیلٹ میں کچھ ایسے انداز سے نصب کیا گیا ہے کہ گھڑی باندھنے کی صورت میں جلد کے اس حصے کی قریب جا پہنچتا ہے جہاں رگیں موجود ہیں- اور اس طرح وہ یہاں سے زیادہ سے زیادہ درجہ حرارت جسم کو منتقل کرتا ہے-

آپ اس گھڑی میں موجود سسٹم کی مدد سے اپنے جسم کو اتنی ہی ٹھنڈی یا گرم لہریں مہیا کرسکتے ہیں جتنی کہ مناسب سمجھتے ہیں- یہ گھڑی استعمال کے حوالے سے آسان بنائی گئی ہے اور اس میں ایک اسکرین کے علاوہ صرف تین سادہ بٹن نصب ہیں- اس کے علاوہ یہ گھڑی وقت اور تاریخ بتانے کی سہولت رکھتی ہے-