نسوار کھانے کے شوقین افراد اب ہوجائیں خبردار کیونکہ اب آپ نسوار کے ساتھ لے کر ہوائی سفر طے نہیں کرسکتے۔
پاکستان میں اکثریت نسوار کا استعمال کرتی ہے اور اب ان کے لیے پریشان کن خبر سامنے آئی ہے جس کی خلاف ورزی کرنے والا شخص سخت سزا کا مستحق ہوگا۔
غیر ملکی میڈیا رپورٹس کے مطابق مشرق وسطیٰ میں قائم عرب ممالک کی جانب سے نسوار کو منشیات کی فہرست میں شامل کردیا گیا ،اب نسوار رکھ کر عرب ممالک جانا جرم ہوگا۔
اس ضمن میں اینٹی نارکوٹکس فورس حکام نے خبردار کیا ہے کہ نسوار کے ساتھ فضائی سفر کرنا جرم قرار دے دیا گیا ہے کیونکہ مشرق وسطیٰ کے تمام عرب ممالک نے نسوار کو منشیات کی فہرست میں شامل کردیا ہے۔
سوشل میڈیا پراینٹی نارکوٹکس فورس پنجاب نے وائرل ہونے والے ایک پمفلٹ میں کہا ہے کہ عرب ممالک کی سرزمین پر کسی بھی مسافر کے بیگ سے نسوار برآمد ہوئی تو اس کے خلاف سخت کاروائی کی جائے گی اور سزا بھی دی جائے گی۔