موسم سرما کی بارش اس وقت پاکستان کے مختلف شہروں میں جاری ہے اور کئی شہروں میں تو شدید بارشوں کی وجہ سے سیلابی صورتحال پیدا ہوگئی ہے۔
بلوچستان کے مختلف اضلاع کو اس وقت موسلادھار بارشوں کے باعث سیلابی صورتحال کا سامنا ہے۔ ریسکیو اہلکار سمیت پاک فوف کے جوان مشکل صورتحال سے نمٹنے کے لیے ہر ممکن عملی اقدامات کر رہے ہیں۔
پاک فوج کے اہلکاروں کی جانب سے مقامی لوگوں کو ریسکیو آپریشن کر کے محفوظ مقامات پر منتقل کیا جا رہا ہے۔
آئی ایس پی آر کے مطابق بلوچستان کےساحلی علاقوں میں موسلادھار بارش کاسلسلہ جاری ہے، گوادر اولڈ ٹاؤن کے نشیبی علاقوں میں سیلابی صورتحال ہے اور شہر میں جمع پانی سے مقامی آبادی اور سیاحوں کو شدید مشکلات کا سامنا ہے۔
پھنسے ہوئے افراد کے لیے پاک فوج کا ریسکیو آپریشن جاری ہے اور امدادی سرگرمیوں میں سول انتظامیہ کی مدد بھی حاصل کی گئی ہے۔
دوسری جانب ایرانی حکام نے پانی بھرجانے کے باعث استقلال ڈیم کے سپل وے کھول دیے ہیں جب کہ سیلابی ریلوں سے ندی نالوں میں طغیانی کے باعث مناب کےدوسرے پل کے بالائی کنارے تک پانی پہنچ چکا تھا۔