قاسم آباد کے ڈی ایس پی فیض محمد دایو کو ان کے اپنے ہی گارڈ نے فائرنگ کرکے قتل کردیا اور اپنی گرفتاری پیش کردی۔ جیو نیوز کی تفصیلات کے مطابق جمعرات کوپکوڑا اسٹاپ چاک پر بھٹائی ہوٹل کے قریب پولیس موبائل کے گشت کے دوران ڈی ایس پی اور ان کے گارڈ آصف چانڈیو کے درمیان کسی بات پر تلخ کلامی ہوئی جس کے بعد گارڈ نے گاڑی کے پیچھے رکھی ہوئی سرکاری رائفل سے ڈی ایس پی پر فائرنگ کرکے انھیں شدید زخمی کردیا۔
ڈی ایس پی فیض محمد دایو زخموں کی تاب نہ لاسکے اور اسپتال جاتے ہوئے راستے میں ہی انتقال کرگئے۔ موبائل ڈرائیور جو فائرنگ کے وقت اپنی جان بچانے کے لئے بھاگ گیا تھا اس نے بعد میں بیان دیا کہ آصف چانڈیو نے ڈی ایس پی کو 3 گولیاں سینے میں اور ایک گولی کندھوں پر ماری تھی۔ پولیس نے آصف چانڈیو کو حراست میں لے لیا ہے اور ڈی ایس پی کے قتل کے بعد حیدرآباد پولیس میں افراتفری پھیل چکی ہے۔