مال میں شاپنگ کے دوران چڑھنے اترنے کے لئے آپ ایسکیلیٹر کا استعمال تو لازمی کرتے ہوں گے اور اگر آپ چیزوں پر غور کرنے کے عادی ہیں تو ایسکیلیٹر کے کناروں پر جوتے صاف کرنے والے برش بھی دیکھے ہوں گے۔ لیکن کیا چلتی ایسکیلیٹر پر جوتے صاف کرنا ممکن ہے؟ اگر نہیں تو آخر یہ ہوتے ہی کیوں ہیں؟
جوتے صاف کرنے والے برشز
اپنے قارئین کو یہ بتاتے چلیں کہ ایسکیلیٹر کے برشز کے ان ریشوں کو اسکرٹ ڈیفلیکٹرز کہتے ہیں۔ اب آجائیں ان کے مقصد کی طرف۔ تو جناب ان برشز کا مقصد ایسکیلیٹر پر آپ کی حفاظت کرنا ہوتا ہے۔ دراصل ایسکیلیٹر کی سیڑھیوں اور کناروں کے درمیان دوپٹہ یا جوتے وغیرہ پھنس جائیں تو خطرناک حادثات پیش آسکتے ہیں جس سے چوٹ بھی لگ سکتی ہے اور ایسکیلیٹر کی مشین پھنس بھی سکتی ہے۔ یہ برشز اس لئے موجود ہوتے ہیں کہ آپ کو مشین پر اس خلا سے دور کھڑے ہونے میں مدد کریں تاکہ آپ حادثات سے محفوظ رہیں۔
ایسکیلیٹر پر احتیاط کریں
ایسکیلیٹرز کی بات ہورہی ہے تو بتاتے چلیں کہ دیکھا گیا ہے چھوٹے بچے شرارت میں اس پر بھاگنے لگتے ہیں یا کوئی چیز گر جائے تو اٹھانے لگتے ہیں جبکہ یہ طریقہ کافی غلط ہے۔ بچوں کو اس عمل سے روکیں اور ہمیشہ ان کا ہاتھ تھامے رہیں۔ اس کے علاوہ دوپٹہ وغیرہ سمیٹ کر ایسکیلیٹر پر پاؤں رکھیں تاکہ آپ محفوظ رہیں۔