بھائی بہنوں کا سب سے بڑا سہارا ہوتے ہیں لیکن اس معاشرے میں کچھ بھائی ایسے بھی ہیں جن کا تو یوں لگتا ہے کہ جیسے خون ہی سفید ہو گیا ہو۔ یہاں یہ بات اس لیے کی جا رہی ہے کیونکہ لاہور کے علاقے گوالمنڈی میں ایک افسوسناک واقعہ پیش آیا ہے جسے سن کر ہر شخص شدید پریشان ہے۔
ہوا کچھ یوں کہ بھائی نے آدھے مرلے یعنی کہ 136 اسکوائر فٹ کا کمرا خالی کروانے کیلئے بہن پر ہی گولیاں چلا دیں ۔ جوان بیٹی کی موت پر ماں غم سے نڈھال ہے۔ ماں کا مزید کہنا ہے کہ میری بچی اپنے شوہر اور 4 ماہ کے بچے کے ہمراہ ان کے پاس رہتی تھی لیکن میرا بیٹا یہ کہتا تھا کہ اسے نکالو تاکہ میں اپنے بیوی، بچے یہاں لے کے آؤں۔
جس پر ماں اکثر بیٹے سے کہتی تھی کہ کچھ وقت بعد چلی جائے گی۔ یہی نہیں مقتولہ قرۃ العین کے شوہر کا کہنا تھا کہ میری بیوی کے بھائی نے آج سے 1 ماہ پہلے بھی ہم پر گولیاں چلائیں تھیں لیکن ہم بچ گئے مگر اس مرتبہ گولی میری بیوی کے دماغ میں لگی اور آج میرا 4 ماہ کا بچہ رو رہا ہے، اسے سنبھالنے والا کون ہے؟