زہریلی شراب پینے سے 40 کے قریب افراد جان سے گئے، متعدد کی حالت تشویشناک، پولیس نے زہریلی شراب بیچنے والوں کیخلاف کریک ڈاؤن شروع کردیا۔
بھارتی ریاست بہار کے ضلع سارن میں گزشتہ روز شراب پینے سے متعدد افراد کی حالت خراب ہوگئی، متاثرین کو اسپتال منتقل کیا گیا جہاں 39 افراد کی موت کی تصدیق ہوگئی ہے، لوگوں نے بتایا کہ 3 متاثرین تو اسپتال لے جاتے ہوئے راستے میں ہی دم توڑ گئے تھے۔
یاد رہے کہ رواں سال جولائی میں بھی بھارتی ریاست گجرات میں شراب پینے سے 42 افراد ہلاک ہو گئے تھے اور گزشتہ سال بھی اسی طرح کے ایک واقعے میں شمالی ریاست پنجاب میں تقریباً 100 افراد ہلاک ہو گئے تھے۔
رپورٹس کے مطابق بھارت میں سالانہ پانچ بلین لیٹر کے قریب شراب پی جاتی ہے جس میں سے تقریباً 40 فیصد غیر قانونی طور پر تیار کی جاتی ہے۔ پولیس نے واقعہ کے بعد شراب کی غیر قانونی دکانوں کے خلاف کریک ڈاؤن کرتے ہوئے متعدد افراد کو گرفتار کر لیا ہے۔