ماں دنیا کے خوبصورت ترین رشتے کا نام ہے، اﷲ تعالیٰ نے اس کائنات میں سب سے خوبصورت چیز تخلیق کی وہ ماں باپ ہیں جن کا کوئی نعم البدل نہیں ہوسکتا، بالخصوص ماں جیسی ہستی کو سب سے زیادہ فوقیت حاصل ہے، نرم و نازک سے لڑکی ماں بننے کے بعد بڑے سے بڑے طوفانوں سے بھی ٹکراجاتی ہے۔
ایسا ہی اس ویڈیو میں بھی دیکھ سکتے ہیں کہ ایک ماں نے زلزلے سے لرزتی عمارت میں موجود اپنے بچے کیلئے اپنی جان داؤ پر لگادی۔ زلزلے کے دوران پوری بلڈنگ خالی تھی لیکن اس ماں کا بچہ گھر میں موجود تھا۔
باہر موجود ماں اپنی زندگی کی پرواہ کئے بغیر جھولتی ہوئی بلڈنگ میں داخل ہوگئی اور واکر میں موجود بچے کو بچایا، اللہ کی شان دیکھیں کہ جیسے ماں بچے کو لے کر کمرے سے نکلی، کمرے کی چھت زمین بوس ہوگئی۔
یوں تو ماں باپ کے احسانات ایسے ہیں جن کی کوئی حد نہیں البتہ ماں چوں کہ اولاد کی ولادت سے لے کر تعلیم و تربیت تک ہر میدان میں زیادہ مشقت برداشت کرتی ہے، اس لیے بعض احادیث سے پتا چلتا ہے کہ ماں کے حقوق باپ سے مقدم اور زیادہ ہیں اور اس ویڈیو نے بھی ماں کے پیار اور ممتا کے لازوال جذبے کو مزید تقویت دی ہے۔