قومی کرکٹ ٹیم کے سابق کپتان شاہد آفریدی نے فاسٹ بولر محمد عامر کو ڈانٹنے کی وجہ بتا دی۔
نجی ٹی وی پر گفتگو کرتے ہوئے انہوں نے کہا کہ فاسٹ بولر پر ایگریشن اچھا لگتا ہے،انہیں جارحانہ مزاج ہونا چاہیے۔ میری ایک عادت ہے جب کوئی کھلاڑی کارکردگی نہیں دکھا رہا ہوتا تو میں اس سے بات کرتا ہوں۔
ان کا کہنا تھا کہ میں نے محمد عامر سے بات کی ہے، میں نے بھائیوں کی طرح اسے عزت بھی دی اور ڈانٹا بھی۔ میں نے اس سے پوچھا ہے کہ وہ کیا چاہتا ہے؟
عامر سے ہونے والی گفتگو سے متعلق انہوں نے مزید بتایا کہ ’ آپ نے عزت کمائی، ایک دھبہ لگا ہوا تھا اس سے واپس آئے ہو بلکہ کرکٹ میں دوبارہ زندہ ہوئے ہو۔ یہ کوئی طریقہ ہے کہ جونئیر کھلاڑیوں کے ساتھ غلط زبان استمعال کر رہے ہو۔ کیمرے سے کچھ نہیں چھپتا۔اگریشن کو کنٹرول کرو۔‘
’ اگر آپ نے پاکستان کھیلنا ہے تو وہ بابراعظم کے ساتھ ہی کھیلنا ہے، کل کو کیا آپ اس کے ساتھ آنکھیں ملا پاو گے کیا اس کی کپتانی میں کھیل سکو گے؟ آپ اپنی کارکردگی پر دھیان دو، امید ہے اگلے میچز وہ بہتر نظر آئے گا۔‘