اسلام آباد: پنجاب میں انتخابات کے لیے سپریم کورٹ کے حکم پر 21 ارب روپے الیکشن کمیشن کو جاری نہیں کیے گئے ہیں، یہ مؤقف الیکشن کمیشن کی جانب سے سپریم کورٹ میں جمع کرائے جانے والے جواب میں اختیار کیا گیا ہے۔
ہم نیوز کے مطابق ذمہ دار ذرائع نے بتایا ہے کہ الیکشن کمیشن کی جانب سے سپریم کورٹ میں ایک صفحہ پر مشتمل سر بمہر جواب جمع کرایا گیا ہے۔
ذمہ دار ذرائع کے مطابق تحریری جواب میں کہا گیا ہے کہ نگران حکومت پنجاب کا کہنا ہے سیکیورٹی کیلئے مطلوبہ اہلکاروں سے کم اہلکار فراہم کر سکتے ہیں۔
الیکشن کمیشن نے اپنے تحریری جواب میں بتایا ہے کہ صوبہ پنجاب میں انتخابات کرانے کے لیے تین لاکھ سیکیورٹی اہلکاروں کی کمی ہے۔
ذمہ دار ذرائع کے مطابق الیکشن کمیشن کی جانب سے جمع کرائی جانے والی رپورٹ رجسٹرار آفس میں جمع ہونے کے بعد فوری طور پر چیف جسٹس کو پیش کی گئی ہے۔
وزیر خزانہ نے الیکشن اخراجات بل قومی اسمبلی میں پیش کر دیا
واضح رہے کہ سپریم کورٹ آف پاکستان نے پنجاب اور خیبرپختونخوا میں الیکشن کرانے کے لیے 10 اپریل تک فنڈز فراہم کرنے کا حکم دیا تھا۔