جمعرات کو فرح خان المعروف فرحت شہزادی اور ان کے شوہر احسن جمیل گجر نے نیب طلبی نوٹس پر ایڈوکیٹ اظہر صدیق کے توسط سے جواب جمع کرا دیا ہے۔
نیب میں جمع کرائے گئے جواب میں بتایا گیا ہے کہ ریفرنس دائر کرنے سے قبل نیب نے کردار کشی پر مبنی پریس ریلیز جاری کی جو قانون کی خلاف ورزی ہے۔ نیب کے سیکشن 33 F کے تحت کسی بھی ملزم کو عدالت ہی قانونی ضابطے کے بعد مجرم قرار دے سکتی ہے۔طلبی نوٹس پر جواب میں مزید بتایا گیا ہے کہ عدالت قانونی ضابطے کے بعد شواہد نہ ملنے پر ملزم کو بری کرنے کا بھی اختیار رکھتی ہے۔ نیب کے سیکشن 33G کے تحت پریس ریلیز کےذریعے کردار کشی کرنا قابل گرفت ہے۔ایڈوکیٹ اظہر صدیق نے نیب کو جواب لکھتے ہوئے مزید بتایا ہے کہ نیب کردار کشی کرنے پر پہلے ذمہ دار متعلقہ افسران کو سزا دے۔ نیب کو پرائیوٹ بزنس کے معاملے میں تحقیقات کرنے کا کوئی اختیار نہیں ہے۔تحریری جواب میں فرح خان اور ان کے شوہر احسن جمیل گجر کے کاروبار کے متعلق وضاحت بھی دی گئی ہے۔ جواب میں لکھا ہے ’فرح خان اور ان کے شوہر احسن جمیل گجر کا اپنا کاروبار ہے۔ نیب کی جانب سے کاروباری معاملے کی تحقیقات اپنے دائرہ اختیار سے تجاوز ہے۔ جن بینک اکاؤنٹس کو بنیاد بنا کر چھان بین شروع کی گئی ہے وہ پہلے سے ظاہر کردہ ہیں۔‘نیب طلبی نوٹس پر جواب میں تحریر کیا گیا ہے کہ فرح خان اور ان کے شوہر نیب کے خلاف ہتک عزت کی کارروائی کا حق محفوظ رکھتے ہیں۔ واضح رہے کہ فرح خان اور ان کے شوہر احسن جمیل گجر کو نیب نے جمعرات کو طلبی کے نوٹس جاری کر رکھے ہیں۔