پاکستان کے نگراں وزیراعطم انوار الحق کاکڑ نے تصدیق کی ہے کہ سعودی عرب اور متحدہ عرب امارات اگلے تین برسوں کے دوران پاکستان میں 25 پچیس ارب ڈالرز کی سرمایہ کاری کریں گے۔
عرب نیوز کی رپورٹ کے مطابق وزیراعظم نے کہا کہ سعودی عرب اور متحدہ عرب امارات پاکستان میں یہ سرمایہ کاری پراجیکٹس کی مد میں کریں گے۔سعودی عرب اور متحدہ عرب امارات یہ سرمایہ کاری سپیشل انویسٹمنٹ فیسیلیٹیشن کونسل (ایس آئی ایف سی) کے زیر سایہ پراجیکٹس پر کریں گے۔ واضح رہے سابق وزیراعظم شہباز شریف کی حکومت میں جون میں اس کونسل کو بنایا گیا تھا جس کا مقصد پاکستان میں سرمایہ کاروں کو سہولت فراہم کرنا اور ملک کی معیشت کو سنبھالنا تھا۔اطلاعات کے مطابق اتوار کو پاکستانی فوج کے سربراہ جنرل عاصم منیر نے کراچی میں کاروباری شخصیات کے ساتھ ملاقات میں کہا تھا کہ نئی بنائی گئی کونسل سعودی عرب، متحدہ عرب امارات، قطر اور کویت سے 100 ارب ڈالر تک کا سرمایہ لانے کی صلاحیت رکھتی ہے۔پیر کو بین الاقوامی اداروں کے صحافیوں سے ملاقات کے دوران نگراں وزیراعظم انوار الحق کاکڑ نے آرمی چیف کی جانب سے دیے گئے بیان کی تصدیق کی ہے۔ملاقات کے دوران نگراں وزیراعظم کا کہنا تھا کہ سعودی عرب اور متحدہ عرب امارات کی طرف سے یہ سرمایہ کاری دو، تین برسوں میں کی جائے گی جس کا مرکز کان کُنی اور معدنیات سیمت دیگر سیکٹرز ہوں گے۔سعودی عرب اور متحدہ عرب امارات کی جانب سے پاکستانی وزیراعظم کے بیان پر تاحال کوئی تبصرہ نہیں کیا گیا ہے۔