اسلام آباد۔14جنوری (اے پی پی):پاکستان کے عوام کی جانب سے غزہ کے مظلوم لوگوں کے لئے طبی اور کھانے پینے کی اشیاء پر مشتمل 20 ٹن سامان کی چوتھی کھیپ اردن پہنچ گئی۔
اتوار کو این ڈی ایم اے کے ٹویٹ کے مطابق اردن میں پاکستان کے سفیر اور اردنی چیف آف ایئر سٹاف نے غزہ کے متاثرہ لوگوں میں تقسیم کے لیے امدادی کھیپ وصول کی۔ واضح رہے کہ فلسطینی بہن بھائیوں کی مدد کے لیے پاکستان کی جانب سے امدادی سامان کی فراہمی کا سلسلہ جاری ہے ۔امدادی سامان کی چوتھی کھیپ پاک فضائیہ کی خصوصی پرواز کے ذریعے روانہ کی گئی تھی ۔20 ٹن ضروری اشیاء پر مشتمل چوتھی امدادی کھیپ میں غزہ میں زمینی ضروریات کے مطابق سرجیکل/طبی سامان، خشک کھانے کی اشیاء کے علاوہ حفظان صحت کی کٹس بھی شامل ہیں ۔