اسلام آباد۔22جنوری (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ ایسی کوئی صورتحال نہیں ہوگی جس سے الیکشن کے انتظامات اور انعقاد میں کوئی مسئلہ درپیش آئے۔ پیر کو یہاں میڈیا سے گفتگو کرتے ہوئے انہوں نے کہا کہ لوگوں کی زندگیوں کو خطرات پر الرٹس جاری ہوتے ہیں، متعلقہ ادارے حفاظتی اقدامات کر رہے ہیں، ان الرٹس کا الیکشن کے انعقاد سے کوئی تعلق نہیں۔
انہوں نے کہا کہ ایسے مسائل ماضی میں بھی آتے رہے ہیں، 2008 اور 2013 کے انتخابات میں سکیورٹی کے مسائل زیادہ سنگین تھے، اللہ پر بھروسہ اور سکیورٹی اداروں کی صلاحیتوں پر اعتماد رکھیں، انتخابات انشاء اللہ 8 فروری 2024 کو ہوں گے۔ ایک سوال پر انہوں نے کہا کہ مجھے پورا یقین ہے کہ ایسی کوئی صورتحال نہیں ہوگی جس سے الیکشن کے انتظامات اور انعقاد میں کوئی مسئلہ درپیش آئے۔