اسلام آباد۔24جنوری (اے پی پی):نگران وزیرِ اعظم انوار الحق کاکڑ نے کہا ہے کہ حکومت گردشی قرضے میں کمی لانے کیلئے حکومت ہر ممکن اقدامات اٹھا رہی ہے، وزارت توانائی گردشی قرضےکے خاتمے کیلئے ایک مؤثر، دیرپااور قابل عمل حکمت عملی بنا کر پیش کرے، گردشی قرضے میں کمی لانے کیلئے تمام فریقین کو مل کر کام کرنا ہوگا۔
بدھ کو وزیراعظم آفس کے میڈیا ونگ سے جاری پریس ریلیز کے مطابق نگران وزیرِ اعظم انوار الحق کاکڑ کی زیرِ صدارت توانائی کے شعبے میں گردشی قرضے میں کمی کے لائحہ عمل پر جائزہ اجلاس منعقد ہوا۔ اجلاس میں نگران وفاقی وزراء ڈاکٹر شمشاد اختر، محمد علی اور متعلقہ اعلیٰ حکام نے شرکت کی۔اس موقع پر نگران وزیراعظم نے کہا کہ حکومت سنبھالتے ہی ہم نے ترجیحی بنیادوں پر معیشت کی بحالی کیلئے اقدامات کئے، گردشی قرضے میں کمی لانے کیلئے حکومت ہر ممکن اقدامات اٹھا رہی ہے۔ انہوں نے وزارت توانائی کو ہدایت کی کہ گردشی قرضےکے خاتمے کیلئے ایک مؤثر، دیرپااور قابل عمل حکمت عملی بنا کر پیش کی جائے۔ انہوں نے کہا کہ گردشی قرضے میں کمی لانے کیلئے تمام فریقین کو مل کر کام کرنا ہوگا، انسدادِ بجلی چوری آپریشن سے بجلی کی تقسیم کار کمپنیوں کی وصولیوں میں خاطر خواہ بہتری آئی ہے۔اجلاس کو پٹرولیم اور توانائی کے شعبوں کے گردشی قرضے کی موجودہ صورت حال پر تفصیلی بریفنگ دی گئی۔ اجلاس کو مختلف کمپنیوں کے گردشی قرضوں کے حوالے سے آگاہ اور ان قرضوں میں کمی کے لئے مختلف تجاویز بھی پیش کی گئیں۔ وزیرِ اعظم نے متعلقہ وزارت کو وزارتِ خزانہ سے مشاورت کے بعد ایک جامع و پائیدار لائحہ عمل بنا کر پیش کرنے کی بھی ہدایت کی۔