اسلام آباد۔15فروری (اے پی پی):نگران وفاقی وزیر داخلہ ڈاکٹر گوہر اعجاز کی زیر صدارت جمعرات کو منعقدہ اجلاس میں جڑواں شہروں راولپنڈی اسلام آباد میں پانی کی فراہمی، صفائی اور فضلہ کو ٹھکانے لگانے کے موجودہ نظام کا جائزہ لیا گیا۔ اجلاس میں وفاقی وزیر اطلاعات مرتضیٰ سولنگی نے خصوصی شرکت کی جبکہ چیف کمشنر اسلام آباد، لوکل گورنمنٹ ڈیپارٹمنٹ، آر ڈی اے اور کنٹونمنٹ بورڈ کے نمائندگان بھی اجلاس میں موجود تھے۔
اجلاس کو بتایا گیا کہ آٹھ ہزار کارکن صفائی پر مامور ہیں جو سات ارب روپے کے سالانہ بجٹ کے ساتھ روزانہ تقریباً 2300 ٹن کچرا ٹھکانے لگاتے ہیں لیکن اس کے باوجود دونوں شہروں میں صفائی کو معیاری قرار نہیں دیا جا سکتا۔ اجلاس کو بتایا گیا کہ اس وقت جڑواں شہروں کو پانی کی 47 فیصد کمی کا سامنا ہے۔ وزیر داخلہ نے کہا کہ ہم چاہتے ہیں کہ دارالحکومت دوسرے شہروں کیلئے روشن مثال بنے، پانی کی فراہمی اور صفائی بنیادی ضروریات ہیں، کل کی ضروریات کو پورا کرنے کیلئے ہیں آج فیصلہ سازی کرنا ہوگی۔انہوں نے کہا کہ مربوط، جامع اور موثر نظام وضع کرنا ہو گا تاکہ عوام کو معیاری سہولیات فراہم کی جا سکیں۔ وزیر داخلہ نے کہا کہ اس ضمن میں جلد از جلد تمام ضروری افدامات پر عملدرآمد یقینی بنایا جائے۔ انہوں نے کہا کہ بھل صفائی کو یقینی بنانا پانی کی فراہمی کے نظام کی بہتری کے لئے ناگزیر ہے۔اس موقع پر وفاقی وزیر اطلاعات نے کہا کہ زیر زمین پانی کی سطح میں بہتری پانی کی فراہمی میں انتہائی اہم ہے اس لئے اس جانب توجہ مرکوز کرنا ہو گی۔ انہوں نے کہا کہ اسلام آباد کے قدرتی نالوں کی صفائی کو بھی یقینی بنانا ہو گا۔