وفاقی وزیر ریلوے حنیف عباسی نے ٹرینوں میں کیمرے نصب کرنے کا فیصلہ کر لیا ہے۔ انہوں نے پاکستان ریلوے کی 2025 کی کارکردگی پر بریفنگ دیتے ہوئے کہا کہ ریلوے نے رواں سال 93 ارب روپے سے زائد ریونیو حاصل کیا ہے جبکہ مالی سال 2025-26 کی پہلی ششماہی میں 50 ارب روپے آمدن متوقع ہے۔ ان کا کہنا تھا کہ سال کے اختتام پر پاکستان ریلوے اپنی تاریخ میں پہلی بار ایک کھرب روپے آمدن کا سنگِ میل عبور کرے گا۔
وزیر ریلوے کے مطابق سیفٹی ڈپارٹمنٹ کو ڈائریکٹوریٹ کا درجہ دے دیا گیا ہے جس کے بعد ریلوے حادثات میں نمایاں کمی آئی ہے۔حادثات کی شرح 0.09 فیصد سے کم ہو کر 0.04 فیصد رہ گئی ہے جبکہ ڈائریکٹوریٹ کے قیام کے بعد کوئی سنگین نوعیت کا حادثہ پیش نہیں آیا۔
حنیف عباسی نے بتایا کہ راولپنڈی کو ملک کا پہلا اسمارٹ ریلوے اسٹیشن بنا دیا گیا ہے جہاں کیمرے اور جدید سیکیورٹی سسٹم نصب ہیں۔ 2026 میں دیگر بڑے اسٹیشنز کو بھی اسمارٹ بنایا جائے گا جبکہ ٹرینوں میں بھی کیمرے لگانے کا فیصلہ کر لیا گیا ہے۔
انہوں نے کہا کہ صرف 8 ماہ میں 8 ٹرین ریکس کو اپ گریڈ کیا گیا ہے جن میں شالیمار، پاک بزنس، لاثانی اور فیض احمد فیض ایکسپریس شامل ہیں۔ دسمبر 2026 تک پاکستان ریلوے کی تمام ٹرینیں اپ گریڈ کر دی جائیں گی۔
وزیر ریلوے کے مطابق لاہور، کراچی، راولپنڈی اور فیصل آباد سمیت بڑے اسٹیشنز کو اپ گریڈ اور ریلوے کو مکمل طور پر ڈیجیٹائز کر دیا گیا ہے۔ وزارت کا تمام نظام ای فائلنگ پر منتقل ہو چکا ہے جبکہ بڑے اسٹیشنوں پر اے ٹی ایم، ڈی وی ایم اور پی او ایس مشینیں نصب کر دی گئی ہیں۔
انہوں نے مزید بتایا کہ عملے کی حاضری کمپیوٹرائزڈ کر دی گئی ہے اور بغیر دفتر آئے کوئی ملازم تنخواہ حاصل نہیں کر سکے گا۔ 2025 میں قابضین سے 394 ایکڑ ریلوے اراضی واگزار کروائی گئی ہے جبکہ دسمبر 2026 تک تمام اراضی واگزار کروانے کا ہدف مقرر کیا گیا ہے۔
حنیف عباسی نے کہا کہ تین ریلوے اسکول آؤٹ سورس کر دیے گئے ہیں جبکہ دیگر آئندہ 6 ماہ میں کیے جائیں گے۔ اس کے علاوہ 11 مزید ٹرینیں بھی آؤٹ سورس کی جا رہی ہیں۔
وزیر ریلوے کے مطابق لاہور، خانیوال، ملتان، کراچی اور راولپنڈی اسٹیشنوں پر صفائی کا انتظام آؤٹ سورس کیا گیا ہے جس کے بعد اب ان اسٹیشنوں پر رات کے 12 بجے بھی صفائی کا عمل جاری رہتا ہے۔ اسٹیشنوں پر کھانے کے معیار کو بہتر بنایا گیا ہے اور فوڈ اتھارٹیز کسی بھی وقت معائنہ کر سکتی ہیں۔انہوں نے بتایا کہ کراچی تا روہڑی ٹریک منصوبے پر آئندہ جولائی میں گراؤنڈ بریکنگ کی جائے گی۔