کرک کے علاقے گرگری میں دامی بانڈہ کے مقام پر نامعلوم مسلح افراد نے پولیس موبائل پر فائرنگ کر دی جس کے نتیجے میں گاڑی میں آگ بھڑک اٹھی اور اس میں سوار پانچوں پولیس اہلکار موقع پر ہی شہید ہو گئے۔
پولیس کے مطابق واقعہ تھانہ گرگری کی حدود میں پیش آیا۔ شہید ہونے والے اہلکاروں کی شناخت شاہد اقبال، صفدر، عارف، سمیع اور محمد ابرار کے نام سے ہوئی ہے۔ ڈی پی او کرک سعود خان نے واقعے کی تصدیق کرتے ہوئے بتایا کہ پولیس موبائل میں کل پانچ اہلکار سوار تھے اور تمام اہلکاروں نے جامِ شہادت نوش کیا۔
واقعے کے فوراً بعد پولیس کی بھاری نفری نے علاقے کو گھیرے میں لے کر سرچ آپریشن شروع کر دیا جبکہ جائے وقوع سے شواہد اکٹھے کر کے تفتیش کا آغاز کر دیا گیا ہے۔ پولیس حکام کا کہنا ہے کہ حملہ آوروں کی تلاش جاری ہے اور واقعے کے تمام پہلوؤں سے تحقیقات کی جا رہی ہیں۔