اسلام آباد۔15فروری (اے پی پی):نمائنده خصوصى وزيراعظم برائے بین المذاہب ہم آہنگی ،مشرق وسطی و اسلامی ممالک و چیئرمین پاكستان علماء كونسل حافظ محمد طاہر محمود اشرفى نے کہا ہے کہ جمعہ16 فروری سے پورے ملک میں پرائیویٹ حج آپریٹرز کے ذریعے پرائیویٹ حجاج کی بکنگ کا آغاز ہو رہا ہے، وزیراعظم اور عسکری قیادت کی خصوصی کوششوں سے ڈالر کی قیمت پر کنٹرول کی وجہ سے حج سستا ہوا۔
وہ حج 2024كےحوالہ سے پرائیویٹ حج آپریٹرز آرگنائزیشن (ہوپ )كےنمائندوں كے ہمراه پریس کانفرنس سے خطاب کررہے تھے۔اس موقع پر چیئرمین ہوپ جمال ترکئی ،وائس چیئرمین ثنا ء اللہ سمیت دیگر عہدیداران بھی موجود تھے۔ حافظ محمد طاہر محمود اشرفى نے کہا کہ اس سال آرمی چیف عاصم منیر اور وزیراعظم انوارالحق کاکڑ کی خصوصی کوششوں سے ڈالر کی قیمت پر کنٹرول کی وجہ سے حج سستا ہوا ۔انہوں نے کہا کہ کل 16 فروری سے پورے ملک میں پرائیویٹ حج آپریٹرز کے ذریعے پرائیویٹ حجاج کی بکنگ کا آغاز ہو رہا ہے۔ اس سکیم کے تحت 25فروری تک عوام فائدہ اٹھا سکتے ہیں۔ 25فروری تک پرائیویٹ گروپ کے ساتھ اور سپانسرز شپ کے تحت حجاج اپلائی کر سکتے ہیں۔سعودی حکومت کی طرف سے اس مرتبہ وقت سے پہلے آغاز کیا جا رہا ہے جس پرسعودی حکومت کے مشکور ہیں ۔ انہوں نے کہا کہ میڈیا کے ذریعے عوام کو آگا ہ کیا جارہا ہے ہوپ اور وزارت مذہبی امور کے تعاون کے ساتھ ہیلپ لائن کا آغاز بھی کیاجا رہا ہے۔حافظ محمد طاہر محمود اشرفی نے کہا کہ حکومت کی شفاف پالیس کے تحت کوئی بھی حج آپریٹر کوٹہ سے محروم نہیں ہوا ۔ اب حج ٹور آپریٹرز منتظمین کی ذمہ داری ہے کہ حجاج کرام کو بہترین سہولیات کی فراہمی کو یقینی بنائے اور حجاج کرام کو کسی قسم کی کوئی تکلیف پیش نہ آئے۔ حج ایک مذہبی فریضہ ہے جسے ہر صاحب استطاعت کو پورا کرنا لازمی ہے۔ ہوپ نے اپنے طور پر بھی حجاج کرام کی شکایات کے ازالے کے کئے ایک احتسابی عمل شروع کیا ہے جو کہ خوش آئند ہے۔ احتسابی پالیسی پر منظم طریقے سے عملدرآمد کیا جائے۔انہوں نے کہا کہ پہلے دو ہزار حجاج کی معاونت کے لئے منتظمین ہوتے تھے اس مرتبہ حکومت پاکستان اور آرمی چیف کی سعودی کی حکومت کے ساتھ خصوصی کوششوں سےمنتظمین کے ماتحت500حجاج کرام ہونگے۔ انہوں نے کہا کہ اوور سیز پاکستانیوں کے لئے بھی موثر حکمت عملی بنائی گئی ہے۔اس مرتبہ حاجیوں کی عمر کی کوئی حد مقرر نہیں کی گئی ہے۔ ہوپ کے چیئرمین جمال ترکی نے حکومت سے اپیل کی کہ اوورسیز کے لئے پاسپورٹ کے حصول کے لئے الگ فیس بنائے جائیں اور حکومت پاکستان سے مطالبہ کیا کہ بیرون ممالک سے حج پیکیج کے لئے زرمبادلہ پاکستان میں بینکوں میں بھیجنے کے بجائے ڈائریکٹ سعودی عرب بھیجنے کی اجازت دی جائے۔انہوں نے بتایا کہ ملک بھر میں حافظ محمد طاہر محمود اشرفی کی نگرانی میں حجاج کے کئے تربیتی پروگرام بھی شروع کیے جارہے ہیں۔ انہوں نے حکومت سے اپیل کی کہ 16سے 25 فروری تک جو ہمیں وقت ملا ہے اس میں مزید اضافہ کیا جائے۔