انڈیا کے عام انتخابات کے ساتویں اور آخری مرحلے میں پولنگ کا عمل جاری ہے۔ہندوستان ٹائمز کے مطابق لوک سبھا انتخابات کے ساتویں مرحلے کے آغاز پر انڈین وزیراعظم نریندر مودی نے ووٹروں سے اپیل کی ہے کہ ’آئیے اپنی جمہوریت کو مزید متحرک بنائیں۔‘انڈیا کی پارلیمنٹ کے ایوان نمائندگان یا لوک سبھا کے انتخابات کے ساتویں مرحلے میں 57 حلقوں میں کل 904 امیدوار میدان میں ہیں۔وزیراعظم نریندر مودی نے سنیچر کو 57 انتخابی حلقوں کے ووٹروں سے اپیل کی کہ وہ لوک سبھا انتخابات میں بڑی تعداد میں شرکت کریں اور اپنا ووٹ ڈالیں۔وارانسی کے حلقے سے الیکشن لڑنے والے نریندر مودی نے ایکس پر پوسٹ کیا کہ ’آج 2024 کے لوک سبھا انتخابات کا آخری مرحلہ ہے۔ چونکہ 8 ریاستوں اور یونین ٹیریٹری میں 57 سیٹوں پر پولنگ ہو رہی ہے، جس میں ووٹروں سے بڑی تعداد میں ٹرن آؤٹ اور ووٹ ڈالنے کی اپیل کی جا رہی ہے۔ مجھے امید ہے کہ نوجوان اور خواتین ووٹرز ریکارڈ تعداد میں اپنا حق رائے دہی استعمال کریں گے۔ آئیے مل کر اپنی جمہوریت کو مزید متحرک بنائیں۔‘آٹھ ریاستوں اور مرکز کے زیر انتظام علاقوں کے 57 حلقوں میں مودی سمیت 904 امیدواروں کی قسمت کا فیصلہ ایک لاکھ پولنگ سٹیشنوں پر 10 کروڑ ووٹر کریں گے۔انڈیا کی سب سے زیادہ آبادی والی ریاست اتر پردیش میں ساتویں مرحلے میں 80 میں سے 13 نشستوں پر پولنگ ہوگی۔ وارانسی سب سے ہائی پروفائل حلقہ ہے، جہاں سے نریندر مودی مسلسل تیسری بار پارلیمنٹیرین کے طور پر انتخاب لڑ رہے ہیں۔ ان کا مقابلہ اتر پردیش کانگریس کے سربراہ اجے رائے سے ہے۔اتر پردیش کے وزیراعلی یوگی آدتیہ ناتھ کے گڑھ گورکھپور میں بی جے پی کے موجودہ رکن پارلیمنٹ روی کشن کا مقابلہ سماج وادی پارٹی کی کاجل نشاد اور بہوجن سماج پارٹی کے جاوید اشرف سے ہے۔ مرکزی وزیر انوپریہ پٹیل مرزا پور سے الیکشن لڑ رہی ہیں۔بہار میں ساتویں مرحلے میں پٹنہ صاحب اور پاٹلی پترا سمیت آٹھ سیٹوں پر پولنگ ہوگی۔ لالو پرساد کی بیٹی میسا بھارتی پاٹلی پترا سے الیکشن لڑ رہی ہیں۔ دوسری طرف سابق مرکزی وزیر روی شنکر پرساد پٹنہ صاحب سے الیکشن لڑ رہے ہیں۔
اس مرحلے میں پنجاب کی تمام 13 سیٹوں پر ووٹنگ ہو رہی ہے۔ حکمراں عام آدمی پارٹی اور اس کے انڈیا بلاک میں شامل اتحادی جماعت کانگریس اکیلے الیکشن لڑ رہی ہیں۔