پاکستان تحریک انصاف نے الیکشن ترمیمی ایکٹ سپریم کورٹ میں چیلنج کر دیا۔
پی ٹی آئی چیئرمین بیرسٹر گوہر علی خان نے آئینی درخواست سپریم کورٹ میں دائر کر دی، درخواست میں الیکشن ترمیمی ایکٹ کو کالعدم قرار دینے کی استدعا کی گئی ہے۔
سلمان اکرم راجہ کی وساطت سے آرٹیکل 184/3 کی درخواست سپریم کورٹ میں دائر کی گئی ہے جس میں وفاق اور الیکشن کمیشن کو فریق بنایا گیا ہے۔
مخصوص نشستیں، الیکشن کمیشن کا سپریم کورٹ کے فیصلے پر نظرثانی درخواست دائر کرنے کا فیصلہ
درخواست میں عدالت سے استدعا کی گئی ہے کہ الیکشن ترمیمی ایکٹ کو غیر آئینی و غیر قانونی قرار دیا جائے، الیکشن کمیشن کو مخصوص نشستیں دوسری سیاسی جماعتوں کو الاٹ کرنے سے فوری روکنے کی استدعا بھی کی گئی۔
درخواست میں مزید استدعا کی گئی کہ خواتین و غیر مسلم کی مخصوص نشستیں پاکستان تحریک انصاف کو الاٹ کرنے کا حکم دیا جائے، درخواست میں کہا گیا کہ تحریک انصاف مخصوص نشستوں کی فہرستیں الیکشن کمیشن میں جمع کرا چکی ہے، 12 جولائی کے فیصلے کے بعد مخصوص نشستیں تحریک انصاف کا حق ہے۔
واضح رہے کہ گزشتہ روز قومی اسمبلی نے اپوزیشن کے شدید احتجاج کے باوجود الیکشن ایکٹ ترمیمی بل کثرت رائے سے منظور کیا تھا، سینیٹ نے بھی الیکشن ایکٹ ترمیمی بل کثرت رائے سے منظور کر لیا ہے۔