تحریک انصاف کے رہنماؤں نے قومی اسمبلی میں اپوزیشن لیڈر کے عہدے کے لیے محمود خان اچکزئی کے انتخاب کی امید ظاہر کی ہے۔
چیئرمین پی ٹی آئی بیرسٹر گوہر خان نے کہا ہے کہ اپوزیشن لیڈر کے لیے کاغذات جمع کرا دیے گئے ہیں، جن کی کل تک تصدیق ہوجائے گی جبکہ جمعرات تک تقرر متوقع ہے۔ انہوں نے واضح کیا کہ پی ٹی آئی میں کوئی فارورڈ بلاک موجود نہیں۔
چیف وہپ پی ٹی آئی عامر ڈوگر کا کہنا ہے کہ اپوزیشن لیڈر کے لیے پارٹی کا واحد امیدوار محمود خان اچکزئی ہیں اور امید ہے کہ وہ منتخب ہو جائیں گے۔
پی ٹی آئی رہنما اسد قیصر نے کہا کہ اپوزیشن لیڈر کے تقرر کا اختیار اسپیکر کے پاس ہے اور وہ جب چاہیں نوٹیفکیشن جاری کر سکتے ہیں۔ ان کا مزید کہنا تھا کہ قومی اسمبلی میں اپوزیشن لیڈر کا تقرر ہوتے ہی سینیٹ میں بھی تقرر کا عمل مکمل ہو جائے گا۔