پاکستان اور بھارت کے درمیان کل ہونے والے میچ سے قبل پاکستان ٹیم مینجمنٹ نے اپنی پریس کانفرنس ایک بار پھر منسوخ کر دی۔ دونوں ٹیموں نے ہفتے کے روز پری میچ کانفرنسز طے کر رکھی تھیں تاہم پاکستان کیمپ نے پریس کانفرنس منسوخ کرنے کی کوئی وجہ بیان نہیں کی۔
بھارتی ٹیم کے کپتان سوریہ کمار یادو نے بھی باضابطہ پریس کانفرنس نہیں کی البتہ چند بھارتی صحافیوں سے غیر رسمی گفتگو کی۔
دلچسپ امر یہ ہے کہ میچ ریفری اینڈی پائی کرافٹ جن پر 14 ستمبر کے میچ کے بعد تنازع کھڑا ہوا تھا کل کے میچ کے لیے دوبارہ نامزد کیے گئے ہیں۔ یاد رہے کہ اس تنازع کے بعد پاکستان کرکٹ بورڈ نے ایشیا کپ سے ٹیم واپس بلانے کی دھمکی دی تھی تاہم بعد ازاں ریفری نے پاکستان ٹیم منیجر اور کپتان سے معافی مانگ کر وضاحت پیش کی تھی جس کے بعد معاملہ حل کیا گیا۔
ذرائع کے مطابق پاکستان ٹیم کے کھلاڑی اس وقت صرف میچ پر توجہ دینا چاہتے ہیں اور کسی نئی تنازع میں نہیں پڑنا چاہتے اسی وجہ سے آج کی پریس کانفرنس منسوخ کی گئی۔پاکستان ٹیم نے دبئی اکیڈمی میں تین گھنٹے کا پریکٹس سیشن شیڈول کے مطابق مکمل کیا۔