گوادر: وزیرِاعلیٰ بلوچستان کی ہدایات کی روشنی میں ڈائریکٹر جنرل گوادر ڈیولپمنٹ اتھارٹی (جی ڈی اے) معین الرحمن خان کی قیادت اور جی ڈی اے کے شعبۂ واٹر کی دن رات محنت کے بعد شادی کور ڈیم سے پانی کی فراہمی جی ڈی اے کی مین ٹرانسمیشن لائن میں شروع ہوگئی ہے۔ تقریباً 83 کلومیٹر طویل اس پائپ لائن کو ساڑھے تین سال بعد فعال بنایا گیا ہے، جس کے نتیجے میں روزانہ 20 لاکھ گیلن پانی سسٹم میں شامل ہو رہا ہے۔ یہ اقدام شہر میں پانی کے بحران کو کم کرنے میں اہم کردار ادا کرے گا۔
چیف انجینئر جی ڈی اے حاجی سید محمد نے سائیٹ کا دورہ کر کے پانی کی سپلائی کے آغاز کا جائزہ لیا۔ اس موقع پر پروجیکٹ ڈائریکٹر واٹر میرجان بلوچ اور سائٹ انجینئر کامران بھی ان کے ہمراہ تھے۔
واضح رہے کہ گوادر میں گزشتہ پونے دو سال سے بارشیں نہ ہونے کے باعث آنکاڑہ ڈیم گزشتہ چار ماہ سے خشک ہے جبکہ سوڈ ڈیم بھی خشک ہونے کے قریب ہے۔ اسی صورتحال کے پیشِ نظر حکومتِ بلوچستان نے فوری اقدامات کرتے ہوئے شادی کور ڈیم پائپ لائن کو بحال کیا، جس کے نتیجے میں اب دو ملین گیلن پانی روزانہ سپلائی ہو رہا ہے۔
پانی کے بحران پر قابو پانے کے لیے سنسر بورنگ سسٹم اور جی پی اے ڈیسالینیشن پلانٹ کو مکمل گنجائش کے ساتھ فعال کرنے پر بھی تیزی سے کام جاری ہے۔ توقع ظاہر کی جا رہی ہے کہ ان اقدامات کے نتیجے میں گوادر کے عوام کو پانی کی فراہمی میں نمایاں بہتری آئے گی۔