وزیراعظم کی زیر صدارت پاکستان میں سرمایہ کاری کے حجم اور اقتصادی و تجارتی سرگرمیوں کو بڑھانے کے لیے ایک اعلیٰ سطح کا اجلاس ہوا جس میں ملکی معیشت کو نئی سمت دینے اور بیرونی سرمایہ کاری کے فروغ کے لیے قابل عمل منصوبوں پر غور کیا گیا۔
وزیراعظم نے اجلاس سے خطاب کرتے ہوئے کہا کہ زراعت، آئی ٹی، معدنیات، ٹورزم اور قابل تجدید توانائی ایسے شعبے ہیں جہاں بیرون ملک سے سرمایہ کاری کے وسیع مواقع ہیں۔ انہوں نے کہا کہ سرمایہ کاری کے ساتھ ساتھ تجارت کو فروغ دینا بھی حکومت کی پالیسی کا حصہ ہے تاکہ ملکی درآمدات میں اضافہ ہو سکے۔
وزیراعظم نے وزارتوں کو ہدایت کی کہ تمام زیر تکمیل منصوبوں کو وقت پر مکمل کرنے کے لیے تمام وسائل بروئے کار لائے جائیں۔ انہوں نے کہا کہ قابل عمل منصوبوں کی نشاندہی کر کے فوری اقدامات کیے جائیں تاکہ انہیں عملی شکل دی جائے۔ اس موقع پر وزیراعظم نے مستقبل کو مدنظر رکھتے ہوئے ایک جامع روڈ میپ اور تبدیلی کا ایجنڈا تیار کرنے پر زور دیا تاکہ اہداف کو حاصل کیا جا سکے۔
وزیراعظم نے کہا کہ اقتصادی سرگرمیوں کے روڈ میپ میں نجی شعبے کا اہم کردار ہوگا اور ان کی شمولیت کو یقینی بنایا جائے گا۔ انہوں نےکہا کہ جاری معاشی و اقتصادی اصلاحات کی پالیسی نے معیشت کو نئی سمت دی ہے اور شفافیت و جدت کی بدولت ملک ترقی کی راہ پر گامزن ہے۔
ویڈیو لنک کے ذریعے منعقد ہونے والے اجلاس میں وفاقی وزیر ماحولیات مصدق ملک، وفاقی وزیر پیٹرولیم علی پرویز ملک، وفاقی وزیر خزانہ محمد جہانزیب، وفاقی وزیر تجارت جام کمال، وزیر اطلاعات عطا اللہ تارڑ اور وزیر اقتصادی امور احد خان چیمہ شریک ہوئے۔