نیشنل ڈیفنس کالج بنگلا دیش کے آرمڈ فورسز وار کورس کے افسران نے انٹر سروسز پبلک ریلیشنز کا دورہ کیا جہاں ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے وفد کا پرتپاک استقبال کیا۔
دورے کے دوران ڈی جی آئی ایس پی آر نے بنگلا دیشی وفد کو پاکستان کی مسلح افواج کے کردار، پیشہ ورانہ مہارت، جدید دفاعی حکمت عملی اور میڈیا کے ساتھ تعلقات پر تفصیلی بریفنگ دی۔ انہوں نے اس موقع پر کہا کہ پاکستان کی افواج نہ صرف ملکی دفاع بلکہ خطے میں امن و استحکام کے قیام کے لیے بھی اہم کردار ادا کر رہی ہیں۔
بنگلا دیشی وفد نے دورے کو انتہائی مفید قرار دیتے ہوئے کہا کہ اس موقع سے پاکستان کی دفاعی صلاحیتوں اور ادارہ جاتی امور کو قریب سے سمجھنے کا موقع ملا۔ وفد نے اس اعتماد کا اظہار بھی کیا کہ ایسے تبادلے دونوں ممالک کی افواج کے تعلقات کو مزید مضبوط بنانے میں مددگار ثابت ہوں گے۔
دورے کے اختتام پر یادگاری شیلڈز کا تبادلہ کیا گیا جبکہ وفد نے پاکستان کی میزبانی کو سراہتے ہوئے دو طرفہ تعاون اور تعلقات کے فروغ پر زور دیا۔