ایف آئی اے اینٹی کرپشن سیل نے اسلام آباد ایئرپورٹ پر کارروائی کرتے ہوئے ایک اے ایس آئی اور ایک کانسٹیبل کو غیر قانونی امیگریشن میں ملوث ہونے کے الزام میں گرفتار کرلیا۔
ترجمان ایف آئی اے کے مطابق گرفتار اہلکاروں میں اے ایس آئی ارشد اور کانسٹیبل مجاہد شامل ہیں۔ دونوں کے موبائل فونز سے غیر قانونی سرگرمیوں کے واضح شواہد برآمد ہوئے ہیں جن میں ملین روپے کی ٹرانزیکشنز اور غیر ملکی روابط کے ثبوت بھی موجود ہیں۔
تحقیقات سے معلوم ہوا ہے کہ دونوں اہلکار مبینہ طور پر امیگریشن ایجنٹس کے ساتھ رابطے میں تھے اور بیرون ملک جانے والے افراد سے فی کس پچاس ہزار روپے رشوت وصول کرتے تھے۔ موبائل ڈیٹا سے فلپائن اور ازبکستان کو بھیجی گئی غیر قانونی رقوم اور پیغامات کے ثبوت بھی حاصل کیے گئے ہیں۔
ایف آئی اے نے دونوں اہلکاروں کے خلاف مقدمہ درج کر کے مزید تفتیش شروع کر دی ہے جبکہ غیر قانونی امیگریشن نیٹ ورک کے دیگر سہولت کاروں کی تلاش جاری ہے۔