اینٹی نارکوٹکس فورس نے ملک کے مختلف شہروں میں منشیات اسمگلنگ کے خلاف بڑے پیمانے پر کریک ڈاؤن کرتے ہوئے 5 کامیاب کارروائیوں کے دوران خاتون سمیت 7 ملزمان کو گرفتار کر لیا۔ کارروائیوں کے دوران 30 کروڑ 20 لاکھ روپے سے زائد مالیت کی 268.08 کلوگرام منشیات برآمد کی گئی۔
ترجمان اے این ایف کے مطابق اسلام آباد انٹرنیشنل ایئرپورٹ پر دبئی جانے والے ایک مرد اور خاتون کو گرفتار کیا گیا جن کے پیٹ سے مجموعی طور پر 560 گرام وزنی 82 ہیروئن بھرے کیپسولز برآمد ہوئے۔
ایک اور کارروائی میں حاجی شاہ بس ٹرمینل، ضلع اٹک کے قریب ایک گاڑی سے 8.4 کلوگرام چرس برآمد کر کے ایک ملزم کو گرفتار کیا گیا۔ اسی طرح مخدوم انٹرچینج کوٹ مومن، سرگودھا کے قریب گاڑی سے 6 کلوگرام چرس برآمد ہوئی جہاں سے 2 ملزمان کو حراست میں لیا گیا۔
مزید کارروائی میں نیول اینکرج اسلام آباد کے قریب گاڑی اور موٹر سائیکل پر سوار ملزمان سے 3.1 کلوگرام چرس اور 25 گرام ویڈ برآمد کر کے 2 افراد کو گرفتار کیا گیا۔
دریں اثنا بلوچستان کے علاقے اولڈ چمن کے قریب ایک بڑی کارروائی کے دوران 250 کلوگرام ہیروئن برآمد کر لی گئی۔ترجمان اے این ایف کے مطابق تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔