طالبان سے بات چیت چاہتے ہیں مسئلےکا حل ڈائیلاگ سے چاہتے ہیں، صدر پی ٹی آئی خیبرپختونخوا جنید اکبر

پاکستان تحریک انصاف کے خیبر پختونخوا کے صدر جنید اکبر خان نے کہا ہے کہ پارٹی کی پالیسیوں پر صوبے کے عوام نے بھرپور اعتماد کیا ہے اور عوام چاہتے ہیں کہ مسائل کو بات چیت کے ذریعے حل کیا جائے اسی لیے تحریک انصاف طالبان سے بات چیت چاہتے ہیں مسئلےکا حل ڈائیلاگ سے چاہتے ہیں۔

پشاور میں میڈیا سے گفتگو کرتے ہوئے جنید اکبر خان نے کہا کہ خیبر پختونخوا کے عوام نے 8 فروری کے انتخابات میں ہماری پالیسیوں کی تائید کی۔ عوام چاہتے ہیں کہ ہم مل بیٹھ کر مسائل کا پُرامن حل تلاش کریں اسی لیے ہم طالبان سے بات چیت کے ذریعے امن چاہتے ہیں۔

انہوں نے واضح کیا کہ پی ٹی آئی کو صوبے میں واضح مینڈیٹ حاصل ہے اور پارٹی قیادت جب چاہے وزیراعلیٰ کی تبدیلی کا فیصلہ کر سکتی ہے یہ تحریک انصاف کا آئینی اور جمہوری حق ہے۔

جنید اکبر نے مزید کہا کہ سہیل آفریدی تعلیم یافتہ اور ایماندار شخصیت ہیں اور پارٹی ان کے مکمل ساتھ ہے۔ ہمارے 92 ایم پی ایز سہیل آفریدی کو ووٹ دیں گے جبکہ دیگر جماعتوں کے رہنماؤں سے بھی رابطے جاری ہیں اور مثبت ردعمل موصول ہو رہا ہے۔انہوں نے کہا کہ کچھ قوتیں وزیراعلیٰ کے انتخاب میں رکاوٹیں ڈالنے کی کوشش کر رہی ہیں۔

پی ٹی آئی کے صوبائی صدر نے اداروں سے اپیل کی کہ وہ انٹیلیجنس بیسڈ آپریشنز کریں تاکہ کولیٹرل ڈیمیج سے بچا جا سکے۔ انہوں نے کہاکہ امن کے لیے مذاکرات کے ذریعے مسئلہ حل کیا جائے۔