گورنر ہاؤس خیبر پختونخوا کے ترجمان کے مطابق وزیراعلیٰ خیبر پختونخوا علی امین گنڈا پور کا باضابطہ تحریری استعفیٰ آج دوپہر 2 بج کر 30 منٹ پر گورنر ہاؤس کو موصول ہو گیا ہے جس کی وصولی کی تصدیق بھی کر دی گئی ہے۔
ترجمان کے مطابق استعفیٰ وزیراعلیٰ کے معاونِ خصوصی برائے انسدادِ بدعنوانی بریگیڈیئر (ر) مصدق عباسی گورنر ہاؤس لے کر گئے جبکہ وزیراعلیٰ سیکرٹریٹ کے جونیئر کلرک کلیم اللہ نے استعفیٰ گورنر ہاؤس کے عملے کے حوالے کیا۔
گورنر ہاؤس کے کیئر ٹیکر عمران خان نے استعفیٰ وصول کیا اور اڑھائی بجے دوپہر کے وقت کے ساتھ باضابطہ وصولی کی رسید جاری کر دی۔
گورنر خیبر پختونخوا نے کہا کہ آئینِ پاکستان اور متعلقہ قوانین کے مطابق استعفے کی جانچ پڑتال اور قانونی تقاضوں کی تکمیل کے بعد وزیراعلیٰ کے استعفے پر آئینی طریقہ کار کے تحت عمل درآمد کیا جائے گا۔گورنر نے مزید کہا کہ گورنر ہاؤس اس معاملے میں تمام آئینی و قانونی تقاضوں کو مدنظر رکھتے ہوئے شفاف اور منظم طریقہ اپنائے گا۔
علی امین گنڈا پور کا استعفیٰ ہاتھ سے تحریر شدہ ہے جسے گورنر ہاؤس میں موصول کرنے کا عمل مکمل کر لیا گیا ہے۔