پرتگال کے فٹبال اسٹار کرسٹیانو رونالڈو نے کہا ہے کہ وہ سعودی عرب میں رہنے کے اپنے فیصلے پر پختہ یقین رکھتے ہیں اور اس ملک کی صلاحیتوں پر مکمل اعتماد رکھتے ہیں۔
ریاض میں منعقدہ ٹوریس 2025 فورم سے خطاب کرتے ہوئے رونالڈو نے کہا میں خود کو سعودی سمجھتا ہوں اور مختلف شعبوں میں مدد کرنے کی کوشش کر رہا ہوں۔ سب نے دیکھ لیا کہ میرا ریاض آنے کا فیصلہ درست تھا۔
انہوں نے العلا شہر اور بحیرہ احمر منصوبے سے اپنی محبت کا اظہار کرتے ہوئے کہا کہ وہ سعودی عرب کے بڑے ترقیاتی منصوبوں کا حصہ بننے کے خواہاں ہیں اور مملکت کی ترقیاتی صلاحیت اور عزم پر مکمل یقین رکھتے ہیں۔
رونالڈو نے اس سے قبل جون 2024 میں اعلان کیا تھا کہ وہ اپنی زندگی کا باقی حصہ سعودی عرب میں گزارنے کا ارادہ رکھتے ہیں کیونکہ ان کے مطابق سعودی عرب ایک ایسا ملک ہے جہاں امن و سکون کی فضا موجود ہے۔