دنیا کی سب سے بڑی ڈیجیٹل کرنسی بٹ کوائن کی قیمت سات ماہ میں پہلی بار 92 ہزار ڈالر سے نیچے آگئی جس کے بعد کرپٹو مارکیٹ میں مندی کا رجحان مزید گہرا ہوگیا ہے۔
میڈیا رپورٹس کے مطابق پیر کی شام تک بٹ کوائن 91,588 ڈالر پر ٹریڈ ہو رہا تھا جو ایک ہی دن میں 3.3 فیصد کمی کو ظاہر کرتا ہے جبکہ اس دوران ٹریڈنگ والیوم بھی دگنا سے زیادہ بڑھ گیا۔
اعداد و شمار کے مطابق گزشتہ ایک ہفتے میں بٹ کوائن کی قدر تقریباً 13 فیصد کم ہوئی جبکہ 6 اکتوبر سے اب تک اس کی قیمت میں 26 فیصد سے زائد کمی ریکارڈ کی گئی ہے۔ اکتوبر میں بٹ کوائن نے 126 ہزار ڈالر سے زائد کی نئی بلند ترین سطح حاصل کی تھی۔
تجزیہ کاروں کا کہنا ہے کہ بٹ کوائن کا 50 ہفتوں کی موونگ ایوریج سے نیچے جانا اور چار مئی کے بعد پہلی بار 100 ہزار ڈالر سے کم ہفتہ وار اختتامی قیمت مارکیٹ میں احتیاط اور غیر یقینی صورتحال میں اضافے کا باعث بنا ہے۔