وزیراعظم محمد شہباز شریف سے کرغستان کے صدر صادر ژاپاروف نے آج اہم ملاقات کی جس میں دونوں رہنماؤں نے تجارت، توانائی، مواصلات اور دیگر شعبوں میں باہمی تعاون پر تفصیلی بات چیت کی۔
وزیراعظم نے ملاقات کو خوش آئند قرار دیتے ہوئے کہا کہ بیس سال بعد کرغستان کے سربراہ کا پاکستان کا دورہ دونوں ممالک کے تعلقات میں نئے مواقع پیدا کرے گا اور صدر ژاپاروف کا یہ دورہ دو طرفہ تعاون کو فروغ دینے میں انتہائی مفید ہوگا۔
صدر ژاپاروف نے پر تپاک استقبال پر وزیراعظم کا شکریہ ادا کیا اور پاکستان کے ساتھ مختلف شعبوں میں تعاون بڑھانے اور نئے اشتراکی مواقع تلاش کرنے کی خواہش کا اظہار کیا۔ ملاقات میں فیلڈ مارشل سید عاصم منیر، نائب وزیراعظم و وزیر خارجہ محمد اسحاق ڈار، نیشنل سیکیورٹی ایڈوائزر لیفٹیننٹ جنرل عاصم ملک اور معاون خصوصی طارق فاطمی بھی شریک تھے۔
ملاقات کے بعد پاکستان اور کرغزستان نے تجارت، معیشت، زراعت، توانائی، بندرگاہوں کے استعمال، تعلیم اور دیگر شعبوں میں باہمی تعاون کے فروغ کے لیے 15 معاہدوں اور مفاہمت کی یادداشتوں پر دستخط کیے۔
یہ معاہدے دونوں ممالک کے درمیان تجارتی، تعلیمی، ثقافتی اور تکنیکی شعبوں میں تعلقات کو مزید مضبوط کریں گے اور خطے میں تعاون کو فروغ دیں گے۔