اسلام آباد میں شاہراہِ دستور پر پیش آنے والے المناک حادثے میں دو لڑکیوں کی ہلاکت کے کیس میں اہم پیش رفت سامنے آئی ہے۔ یکم اور دو دسمبر کی درمیانی شب اسلام آباد ہائی کورٹ کے جج کے بیٹے ابوذر کی لگژری گاڑی وی ایٹ کی ٹکر سے الیکٹرک اسکوٹی پر سوار دو لڑکیاں، ثمرین حسین اور تابندہ بتول، جاں بحق ہوگئی تھیں۔
ذرائع کے مطابق حادثے میں ہلاک ہونے والی یتیم لڑکی ثمرین حسین کے ورثاء کو دیت کی رقم پیش کر کے صلح کے لیے راضی کرلیا گیا، تاہم انہوں نے رقم کو مسجد کی تعمیر کے لیے استعمال کرنے کی شرط رکھی ہے۔ دوسری لڑکی تابندہ بتول کے ورثاء کو اسلام آباد کے ایس ایس پی آپریشنز کے دفتر سے فون کے ذریعے صلح پر دباؤ ڈالا گیا۔ فون پر ورثاء سے کہا گیا کہ ملزم جج کے بیٹے کا ہے اور عدالت میں لڑنا آسان نہیں ہوگا ساتھ ہی معافی اور دیت کی پیشکش بھی کی گئی لیکن متاثرہ خاندان نے ابتدائی طور پر بات کرنے سے انکار کیا۔
حادثے کے بعد ابوذر کو گرفتار کر لیا گیا تھا تاہم اب قانون کی گرفت سے آزاد کرانے کے لیے مختلف طاقتور حلقے ورثاء پر دباؤ ڈال رہے ہیں۔