آسٹریلیا کے مشہور ساحلی مقام بونڈی بیچ پر فائرنگ کے واقعے میں ملوث حملہ آور باپ بیٹا بھارتی نکلے جن کی شناخت نیو ساؤتھ ویلز پولیس نے جاری کر دی ہے۔ پولیس کے مطابق ہلاک ہونے والے حملہ آور کی عمر 50 سال اور زخمی حملہ آور کی عمر 24 سال ہے۔ ہلاک ہونے والے باپ کا نام ساجد اکرم اور زخمی بیٹے کا نام نوید اکرم ہے۔
ساجد اکرم کا تعلق بھارت سے جبکہ ماں اٹلی کی ہے
24 سالہ حملہ آور نوید اکرم کے ساتھ کام کرنے والے ایک شخص نے کہا کہ نوید کے والد ساجد اکرم کا تعلق بھارت سے ہے جبکہ ماں اٹلی کی ہے۔انہوں نے کہا کہ ہم اس حملے کے بارے میں سوچ بھی نہیں سکتے تھے۔
پولیس کمشنر کے مطابق ساجد اکرم گزشتہ 10 برس سے اسلحہ لائسنس کا حامل اور ایک گن کلب کا رکن تھا۔ ہلاک حملہ آور کے قبضے سے چھ ہتھیار برآمد کیے گئے جبکہ جائے وقوعہ سے دو فعال دیسی ساختہ دھماکا خیز مواد بھی ملے اور محفوظ کر لیے گئے۔ تحقیقات میں یہ معلوم کیا جا رہا ہے کہ یہ ہتھیار فائرنگ میں استعمال ہوئے یا نہیں۔
واقعے کے نتیجے میں 16 افراد ہلاک اور 40 زخمی ہوئے۔ پولیس کی جوابی کارروائی میں ایک حملہ آور موقع پر ہلاک جبکہ دوسرا زخمی حالت میں گرفتار ہوا۔ آسٹریلوی حکومت نے یومِ سوگ کا اعلان کرتے ہوئے سرکاری عمارتوں پر قومی پرچم سرنگوں رکھنے کا حکم دیا۔ پولیس نے اس واقعے کو دہشت گردی قرار دیا۔
واضح رہے کہ واقعے کے بعد بھارتی، اسرائیلی اور افغان میڈیا نے پروپیگنڈا شروع کرتے ہوئے حملہ آوروں کو پاکستانی قرار دینے کی کوشش کی تاہم یہ دعوے بے بنیاد ثابت ہوئے اور پاکستانی حکام نے واضح کیا کہ حملہ آور پاکستانی نہیں تھے۔