پاکستان انڈر 19 کرکٹ ٹیم نے شاندار کارکردگی کا مظاہرہ کرتے ہوئے ایشیا کپ انڈر 19 مینز ون ڈے ٹورنامنٹ کے فائنل کے لیے کوالیفائی کر لیا۔ سیمی فائنل میں پاکستان نے دفاعی چیمپئن بنگلا دیش انڈر 19 کو 8 وکٹوں سے شکست دے دی۔
بارش اور گیلی آؤٹ فیلڈ کے باعث جمعہ کے روز کھیلا جانے والا یہ سیمی فائنل 27 اوورز تک محدود کر دیا گیا۔ پاکستان نے ٹاس جیت کر بنگلا دیش کو بیٹنگ کی دعوت دی، جس پر بنگلا دیشی ٹیم 26.3 اوورز میں 121 رنز بنا کر آؤٹ ہو گئی۔
بنگلا دیش کی جانب سے سمیع النبصیر 33 رنز کے ساتھ نمایاں رہے جبکہ کپتان عزیزالحکیم نے 20 رنز بنائے۔ پاکستان کی طرف سے عبدالسبحان نے شاندار بولنگ کرتے ہوئے 20 رنز دے کر 4 وکٹیں حاصل کیں۔ اس سے قبل وہ بھارت کے خلاف 3 اور متحدہ عرب امارات کے خلاف 4 وکٹیں حاصل کر چکے ہیں۔ حذیفہ احسن نے 2 جبکہ علی رضا، محمد صیام اور احمد حسین نے ایک ایک وکٹ حاصل کی۔
جواب میں پاکستان انڈر 19 نے ہدف 16.3 اوورز میں صرف 2 وکٹوں کے نقصان پر حاصل کر لیا۔ پاکستان کی اننگز میں سمیر منہاس نے شاندار بیٹنگ کا مظاہرہ کرتے ہوئے 6 چوکوں اور 2 چھکوں کی مدد سے ناقابلِ شکست 69 رنز اسکور کیے۔ انہوں نے عثمان خان کے ساتھ دوسری وکٹ کی شراکت میں 85 رنز جوڑے۔ عثمان خان 27 رنز بنا کر آؤٹ ہوئے جبکہ احمد حسین 11 رنز کے ساتھ ناٹ آؤٹ رہے۔
میچ میں شاندار آل راؤنڈ کارکردگی پر عبدالسبحان کو پلیئر آف دی میچ قرار دیا گیا۔
اب پاکستان انڈر 19 ٹیم 21 دسمبر کو فائنل میں روایتی حریف بھارت انڈر 19 کا سامنا کرے گی۔