پاکستان کرکٹ بورڈ کے چیئرمین محسن نقوی ایشیا کپ انڈر 19 ٹورنامنٹ کی پرائز ڈسٹریبیوشن سرمنی میں حصہ لینے کے لیے دبئی کے لیے روانہ ہوگئے، لیکن کرکٹ کے حلقے ایک ہی سوال کر رہے ہیں کہ اگر بھارت آج کا فائنل پاکستان کے خلاف جیت گیا، تو کیا ان کے کھلاڑی محسن نقوی سے ٹرافی لینے کو راضی ہوں گے؟
محسن نقوی جو ایشین کرکٹ کونسل کے چیئرمین بھی ہیں، نے جیتنے والی ٹیم کو ٹرافی دینی ہے۔ مگر 28 ستمبر کو جو ایشیا کپ کے فائنل کے بعد دبئی میں واقعہ پیش آیا اس کے بعد لوگ یہی سوال کر رہے ہیں کہ کیا بھارتی کرکٹ بورڈ یا حکومت اپنے کھلاڑیوں کو اجازت دے گی کہ وہ ٹرافی محسن نقوی سے لے۔
ایشیا کپ میں جو ایک نئی نامناسب ریت بھارت کی ٹیم نے ڈالی تھی وہ تھا پاکستان ٹیم سے ہاتھ نہ ملانا اور وہ سلسلہ ان کی ایمرجنگ ٹیم اور انڈر 19 ٹیم نے بھی جاری رکھا ہے۔ پاکستان کے انڈر 19 ٹیم نے آج فائنل میں شاندار آغاز کیا ہے اور بھارت نے ٹاس جیت کے جب ان کو بیٹنگ کرائی تو اب تک 15 اوورز کے کھیل کے بعد پاکستان کا اسکور 111 پر ایک وکٹ ہے جس میں سبحان منہاس کی نصف سینچری شامل ہے۔