پشاور میں مرغی کی قیمتوں میں مسلسل اضافے کا سلسلہ جاری ہے جہاں ایک ہی دن میں فی کلو قیمت میں مزید 40 روپے کا اضافہ ریکارڈ کیا گیا۔
دو روز کے دوران مجموعی طور پر 65 روپے فی کلو اضافے کے بعد مرغی کی قیمت 440 روپے فی کلو تک جا پہنچی ہے جو اس سے قبل 375 روپے فی کلو تھی۔
مرغی کی قیمتوں میں اچانک اور مسلسل اضافے نے صارفین کو شدید مشکلات سے دوچار کردیا ہے، جبکہ پولٹری کے کاروبار سے وابستہ بعض افراد کے کروڑ پتی بننے کے دعوے بھی سامنے آ رہے ہیں۔
سردی کی شدت میں اضافہ اور شادی سیزن کو مرغی کی قیمتوں میں اضافے کی بڑی وجوہات قرار دیا جا رہا ہے۔
ادھر مرغی کی قیمتوں میں غیر معمولی اضافے کے باعث شہر میں مردہ مرغیوں کی فروخت کا انکشاف بھی ہوا ہے۔ ذرائع کے مطابق مختلف مقامات پر مردہ مرغیوں کو کاٹ کر فروخت کیا جا رہا ہے جو بعد ازاں شہر کے مختلف علاقوں میں سپلائی کی جا رہی ہیں۔
مرغی کی قیمتوں میں اضافے کے ساتھ مردہ مرغیوں کی قیمتوں میں بھی نمایاں اضافہ ہو گیا ہے، جس پر شہریوں نے شدید تشویش کا اظہار کیا ہے۔