وفاقی وزیر داخلہ محسن نقوی نے اعلان کیا ہے کہ پاکستان کا پہلا شہر اسلام آباد کیپٹل اسمارٹ سٹی بنے گا۔ انہوں نے کہا کہ یکم جنوری سے اسلام آباد میں بغیر ایم ٹیگ گاڑیوں کے داخلے پر پابندی عائد کر دی جائے گی۔
وزیر داخلہ محسن نقوی اور وزیر مملکت طلال چوہدری نے اسلام آباد سیف سٹی ہیڈکوارٹرز کا دورہ کیا، جہاں انہوں نے ڈیجیٹل وال پر شہر کے مانیٹرنگ سسٹم، جدید ٹیکنالوجی کے ذریعے امنِ عامہ کے اقدامات اور کنٹرول روم میں قائم اسپیشل چائنیز ڈیسک پر سیکیورٹی سرویلنس کا جائزہ لیا۔
اس موقع پر وزیر داخلہ کی زیر صدارت اہم اجلاس بھی ہوا، جس میں شہریوں کے جان و مال کے تحفظ کے اقدامات پر تفصیلی بریفنگ دی گئی۔ آئی جی اسلام آباد پولیس نے سیف سٹی سے کیپٹل اسمارٹ سٹی منتقلی کے امور سے آگاہ کیا اور بتایا کہ محرم الحرام کے دوران سیف سٹی کیمروں کی مدد سے وقت اور وسائل کی نمایاں بچت ہوئی۔
محسن نقوی نے ہدایت کی کہ کیپٹل سمارٹ سٹی منصوبے پر کام تیز کیا جائے۔ انہوں نے کہا کہ ریسکیو 1122، ٹریفک، سیکیورٹی اور سی ڈی ایم اے سمیت تمام شہری سہولیات کو ایک مرکزی نظام میں ضم کیا جائے گا۔ ان کا کہنا تھا کہ کیپٹل سمارٹ سٹی کے دائرہ کار کو مستقبل میں پورے ملک تک بڑھایا جائے گا اور اسلام آباد کو محفوظ ترین شہر بنانے کے لیے اس منصوبے کو ماڈل کے طور پر اپنایا جائے گا۔
اجلاس میں وفاقی سیکریٹری داخلہ، چیف کمشنر اسلام آباد، ایڈیشنل ڈپٹی کمشنر جنرل اور دیگر اعلیٰ حکام بھی موجود تھے۔