گورنر خیبرپختونخوا فیصل کریم کنڈی نے کہا ہے کہ ہم چاہتے ہیں کہ سیاسی معاملات سیاسی طور پر ہی حل ہوں، ہماری قیادت جیل گئی لیکن کبھی اداروں پر حملہ نہیں کیا۔
اسلام آباد میں پریس کانفرنس کے دوران فیصل کریم کنڈی نے کہا کہ خیبرپختونخوا دہشتگردی کے سنگین چیلنجز کا سامنا کر رہا ہے اور غیر قانونی مقیم افغان مہاجرین کو واپس جانا چاہیے۔ انہوں نے مزید کہا کہ پاکستان میں دہشتگردی میں بعض افغان باشندے ملوث ہیں۔
گورنر کے پی نے بھارت کے حوالے سے کہا کہ پاکستان نے بھارت کو چار دن میں شکست دی اور اس کا جواب دنیا نے دیکھا، جبکہ آج دنیا پاکستان کے ساتھ کاروباری اور دفاعی معاہدے کرنا چاہتی ہے۔
انہوں نے کہا کہ کے پی حکومت کو وفاق کے ساتھ دلیل اور بات چیت کے ذریعے مسائل حل کرنے چاہئیں اور گالم گلوچ سے معاملات حل نہیں ہوسکتے۔
فیصل کریم کنڈی نے بانی پی ٹی آئی کو بھی تنقید کا نشانہ بنایا اور کہا کہ اڈیالہ میں قید رہنے والے قیدی نے ملک میں انتشار پھیلایا۔