بھارت کے شہر میرٹھ میں ایک خاتون نے محبوب سے شادی کے مطالبے کے لیے ہائی وولٹیج بجلی کے ٹاور پر چڑھ کر سب کو حیران کر دیا جس نے 50 برس پرانی شہرہ آفاق ایکشن فلم شعلے کے ایک یادگار منظر کو حقیقت میں دوہرا دیا۔
بھارتی میڈیا کے مطابق، میرٹھ کی رہائشی بسنتی نامی خاتون نے اپنے محبوب ویرو سے شادی کے لیے یہ انتہائی خطرناک قدم اٹھایا۔ پولیس اور ریسکیو ٹیمیں فوری طور پر موقع پر پہنچیں اور خاتون کو نیچے اترنے پر راضی کرنے کی کوشش کی لیکن بسنتی نے کہا کہ اگر اس کی ویرو سے شادی نہ کروائی گئی تو وہ اپنی جان لے لے گی۔ کئی گھنٹوں تک حکام خاتون کو نیچے اتارنے میں ناکام رہے۔
صورتحال کی سنگینی دیکھتے ہوئے حکام نے بسنتی کے محبوب ویرو کو موقع پر بلایا جس کے بعد خاتون کو بحفاظت بجلی کے ٹاور سے نیچے اتارنے میں کامیابی حاصل ہوئی۔
پولیس کے مطابق بسنتی اور ویرو کی ملاقات سوشل میڈیا کے ذریعے ہوئی تھی اور دونوں شادی کرنا چاہتے ہیں مگر مختلف برادریوں سے تعلق رکھنے کی وجہ سے اہلِ خانہ اس رشتے کے خلاف ہیں۔ اس کے پیشِ نظر دونوں خاندانوں کو پولیس اسٹیشن طلب کیا گیا ہے تاکہ معاملے پر بات چیت کی جا سکے اور خاتون کو آئندہ ایسے خطرناک اقدامات سے روکنے کے لیے کونسلنگ فراہم کی جا رہی ہے۔