اسپیکر خیبر پختونخوا اسمبلی نے سیکیورٹی معاملات پر بریفنگ کے لیے کور کمانڈر پشاور کو خط لکھ دیا۔
خط میں اسپیکر نے سیکیورٹی صورتحال پر بریفنگ کا کہا ہے، انہوں نے لکھا کہ اسمبلی نے سیکیورٹی کی خصوصی کمیٹی بنائی، کمیٹی نے آئی جی پولیس، چیف سیکریٹری، ایڈیشنل چیف سیکریٹری سے بریفنگ لی ہے۔
خط کے متن کے مطابق سیکیورٹی کمیٹی نے تمام سیاسی جماعتوں پر مشتمل جرگہ بلایا، کمیٹی نے مشرکہ اعلامیہ جاری کیا، اعلامیہ ساتھ منسلک ہے، کمیٹی ہیڈ کوارٹرز الیون کور سے تفصیلی بریفنگ حاصل کرنے کی خواہش رکھتی ہے۔
خط کے متن کے مطابق خیبر پختونخوا اسمبلی کو ضم شدہ اضلاع میں وفاقی حکومت اور قانون نافذ کرنے والے اداروں کی جانب سے جاری آپریشنز کے تناظر میں بریفنگ دی جائے، وسیع تر سیاسی، سماجی اور ترقیاتی اقدامات کے بغیر، اکیلے آپریشن سے پائیدار امن اور استحکام کو یقینی نہیں بنایا جا سکتا۔
خط میں کہا گیا کہ آپریشن سے صوبے میں مزید بدامنی کا خطرہ ہوسکتا ہے، خصوصی کمیٹی (سیکیورٹی) کے لیے ان کیمرہ بریفنگ کا اہتمام باہمی طور پر مناسب تاریخ اور وقت پر خیبر پختونخوا کی صوبائی اسمبلی میں کیا جائے۔
خط میں ان کیمرہ بریفنگ کے لیے تاریخ اور وقت کا تعین نہیں کیا گیا۔