خیبر پختونخوا اسمبلی میں پاکستان پیپلز پارٹی پارلیمنٹیرینز کے پارلیمانی لیڈر احمد کنڈی نے صوبے میں آٹے کی بڑھتی قیمتوں کے خلاف توجہ دلاؤ نوٹس جمع کرا دیا۔
نوٹس میں کہا گیا ہے کہ صوبائی حکومت کی جانب سے آٹے کا سرکاری کوٹہ تاحال بحال نہ کیے جانے کے باعث صوبے میں آٹے کی قیمتوں میں مسلسل اضافہ ہو رہا ہے، جس سے عام شہری اور متوسط طبقہ شدید مشکلات کا شکار ہیں۔
پیپلز پارٹی کے پارلیمانی لیڈر احمد کنڈی نے نشاندہی کی کہ صوبہ پنجاب کی جانب سے آئینِ پاکستان کے آرٹیکل 155 کے برخلاف آٹے اور گندم کی بین الصوبائی ترسیل پر پابندیاں عائد کی جاتی ہیں، جس کے نتیجے میں خیبر پختونخوا میں آٹے کی قلت اور مہنگائی بڑھ رہی ہے۔
انہوں نے مطالبہ کیا کہ صوبائی حکومت آٹے کی قیمتوں پر قابو پانے کے لیے سرکاری کوٹہ فوری بحال کرنے اور بین الصوبائی رکاوٹوں کے خاتمے کے عملی اقدامات سے ایوان کو آگاہ کرے۔