اسلام آباد میں پاکستان اور کینیڈا کے درمیان آج چھٹی دوطرفہ سیاسی مشاورت کا انعقاد کیا گیا۔ پاکستان کی نمائندگی میں ایمبیسیڈر نبیل منیر، اسپیشل سیکریٹری (اقوام متحدہ) اور ڈائریکٹر جنرل (امریکاز) شریک ہوئے جبکہ کینیڈا کی جانب سے ایمبیسیڈر ویلڈن ایپ، اسسٹنٹ ڈپٹی منسٹر (انڈو-پیسیفک) اور ہائی کمیشنر طارق علی خان نے شرکت کی۔
دونوں فریقین نے حالیہ اعلیٰ سطح کی ملاقاتوں کے تناظر میں تعلقات کی بڑھتی ہوئی مضبوطی پر اطمینان کا اظہار کیا اور اس بات پر زور دیا کہ موجودہ معاہدوں پر عملدرآمد کو بہتر بنایا جائے اور تعاون کے نئے شعبے تلاش کیے جائیں۔
مشاورت میں تجارت و سرمایہ کاری، زراعت و ایگریکلچر ٹیکنالوجی، معدنیات، توانائی، موسمیاتی تبدیلی، مصنوعی ذہانت، آئی ٹی، ہنر مند افرادی قوت کی ترقی، تعلیم و تحقیق، سیاحت اور عوامی رابطوں کو تعلقات کو آگے بڑھانے کے کلیدی شعبے قرار دیا گیا۔
مزید برآں، دونوں ممالک نے عالمی و علاقائی حالات اور باہمی دلچسپی کے کثیرالجہتی امور پر تبادلہ خیال کیا اور باقاعدہ مشاورت جاری رکھنے پر اتفاق کیا تاکہ دوطرفہ شراکت داری میں مزید پیشرفت حاصل کی جا سکے۔