جب میں نے پہلی بار اس 80 فٹ اونچے پہاڑ کو نیچے سے دیکھا تو دل میں آیا کہ یہ چھلانگ تو آسانی سے لگا لوں گا، لیکن جیسے ہی اوپر پہنچا تو نیچے دیکھ کر حالت بدل گئی۔ نیچے میرے لیے ڈبوں کی تہیں اور ایک گدا رکھا گیا تھا مگر اوپر سے وہ سب ماچس کی ڈبی جیسا لگ رہا تھا۔ ایک لمحے کے لیے لگا کہ شاید یہ نہیں کرنا چاہیے، لیکن وہاں کافی لوگ جمع ہو چکے تھے اور اب پیچھے ہٹنا میری انا کو قبول نہیں تھا۔ پھر میں نے خود کو سمجھایا کہ یہ کرنا ہی ہے، میں نے چھلانگ لگا دی مگر نیچے پہنچنے کے بعد تقریباً ڈیڑھ منٹ تک میری سانس بحال نہیں ہوسکی تھی۔
بالی ووڈ کے دبنگ اسٹار سلمان خان نے اپنے کیریئر کے ایک ایسے خطرناک لمحے سے پردہ اٹھایا ہے جسے یاد کرکے آج بھی مداح حیران رہ جاتے ہیں۔
فلمی دنیا میں جہاں کئی اداکار خطرناک سینز کے لیے ڈبل کا سہارا لیتے ہیں، وہیں سلمان خان نے اپنے کیریئر کے آغاز سے ہی خود اسٹنٹس انجام دینے کو ترجیح دی۔ 1990 کی دہائی میں جب سنجے دت اپنی مضبوط جسمانی ساخت کے باعث مشہور تھے، اسی دور میں سلمان خان نے بھی اپنی فٹنس، باڈی بلڈنگ اور ایکشن اسٹائل سے الگ پہچان بنائی۔
حال ہی میں ایک انٹرویو کے دوران سلمان خان نے اپنی زندگی کے ایک ایسے اسٹنٹ کا ذکر کیا جس نے چند لمحوں کے لیے انہیں خوفزدہ کر دیا تھا۔ اداکار کے مطابق منظر بظاہر آسان لگ رہا تھا لیکن جیسے ہی وہ پہاڑ کی چوٹی پر پہنچے، نیچے کی گہرائی دیکھ کر ان کا اعتماد ہلنے لگا۔
سلمان خان نے بتایا کہ شوٹنگ ٹیم نے ان کی حفاظت کے لیے نیچے خصوصی انتظامات کیے تھے، مگر بلندی سے دیکھنے پر سب کچھ انتہائی چھوٹا محسوس ہو رہا تھا۔ اس لمحے ان کے ذہن میں یہ خیال بھی آیا کہ شاید وہ یہ اسٹنٹ نہ کریں، لیکن سینکڑوں لوگوں کی موجودگی نے انہیں پیچھے ہٹنے نہ دیا۔
اداکار نے کہا کہ بعض اوقات انسان خوف کے باوجود صرف اپنی عزتِ نفس اور اعتماد کی خاطر وہ کام کر جاتا ہے جس کا تصور بھی مشکل لگتا ہے۔ سلمان خان کے مطابق جب انہوں نے چھلانگ لگائی تو جسم پر ایسا دباؤ پڑا کہ چند لمحوں کے لیے سانس لینا مشکل ہوگیا تھا۔
سلمان خان کی یہی بےخوف شخصیت انہیں دیگر اداکاروں سے منفرد بناتی ہے۔ فلموں میں ایکشن، خطرناک سینز اور جسمانی فٹنس کے حوالے سے ان کا انداز ہمیشہ مداحوں کے لیے کشش کا مرکز رہا ہے۔ یہی وجہ ہے کہ کئی نئے اداکار بھی انہیں اپنی فٹنس اور اسکرین پریزنس کے حوالے سے آئیڈیل مانتے ہیں۔