"جو لوگ جم جاتے ہیں وہ جانتے ہیں کہ جب کوئی شروع کرتا ہے تو وہ ہلکے وزن سے ہی آغاز کرتا ہے۔ ہر کسی کا لیول ایک جیسا نہیں ہوتا۔ فراح ندیم کو شاید اس لیے سمجھ نہیں آئی کیونکہ وہ خود جم نہیں جاتیں۔"
معروف ٹی وی میزبان اور اس وقت سیاست سے وابستہ اقرار الحسن کی اہلیہ اور فٹنس کے لیے مشہور اروسہ خان نے اپنے شوہر کا دفاع کرتے ہوئے سوشل میڈیا پر جاری تنقید کا جواب دیا ہے۔
یہ تنازع اس وقت شروع ہوا جب اداکارہ فراح ندیم نے اقرار الحسن کی ایک جم ورک آؤٹ ویڈیو پر تبصرہ کرتے ہوئے ان کے انداز اور وزن اٹھانے کے دوران دکھائے گئے تاثرات کو تنقید کا نشانہ بنایا۔ فراح ندیم نے کہا کہ ویڈیو میں اقرار الحسن جس طرح زیادہ تکلیف اور جدوجہد ظاہر کر رہے ہیں، وہ وزن اتنا زیادہ بھی نہیں تھا۔
اس تبصرے کے بعد سوشل میڈیا پر بھی بحث شروع ہو گئی اور متعدد صارفین نے فراح ندیم کی رائے سے اتفاق کیا۔ کچھ لوگوں نے اقرار الحسن کے انداز کو "اداکاری" قرار دیا جبکہ بعض نے کہا کہ وہ کم وزن پر بھی غیر معمولی ردعمل دے رہے ہیں۔
بعدازاں اروسہ خان نے اپنے شوہر کے حق میں ردعمل دیتے ہوئے کہا کہ جم کی دنیا سے تعلق رکھنے والے افراد جانتے ہیں کہ ورزش کا آغاز ہمیشہ ہلکے وزن سے ہوتا ہے اور ہر شخص کی فٹنس لیول مختلف ہوتی ہے۔ ان کے مطابق باہر سے تنقید کرنا آسان ہے لیکن حقیقت کو سمجھنے کے لیے جم کا تجربہ ہونا ضروری ہے۔
یہ معاملہ سوشل میڈیا پر مزید وائرل ہو گیا ہے جہاں دونوں طرف سے مختلف آراء سامنے آ رہی ہیں اور صارفین اس بحث میں دلچسپی لے رہے ہیں۔